Nursultan Nazarbaev 90-jyldardy eske aldy

ASTANA. QazAqparat - QR Prezıdenti Nursultan Nazarbaev Qazaqstanǵa resmı saparmen kelgen Grýzııa basshysy Georgıı Margvelashvılıdi Aqordada qarsy aldy. Shaǵyn quramdaǵy kezdesý kezinde prezıdentter 90-shy jyldardy eske aldy, dep xabarlaıdy QazAqparat tilshisi. 

«Ol bir qıyn-qystaý kezder edi. Keńes odaǵy ydyraǵannan keıingi jyldar bárimizge de ońaı bolǵan joq. Baılanystar úzildi, ekonomıka quldyrady. Sol qıynshylyqtarǵa qaramastan, eńsemizdi tikteı aldyq. Negizi, barlyǵymyz bir mejeden bastaǵan bolatynbyz. Árıne, tabıǵat resýrstarynyń da kómegi aıtarlyqtaı boldy. Degenmen, sonyń barlyǵyn tıimdi paıdalaný da ońaı sharýa emes. Investıtsııadardy tartý qajet jáne taǵysyn taǵylar. Qazaqstan osy jaýapty mindetti  sátti iske asyra bildi. Bizdiń qazirgi jetistikterimiz kóp elderge unaıdy», - dep atap kórsetti Nazarbaev shaǵyn quramda ótken kezdesýde.

Aıta keteıik, kezdesý barysynda Georgıı Margvelashvılı Qazaqstannyń qoldaýy úshin Grýzııa xalqynyń sheksiz rıza ekendigin jetkizdi.

«Biz Sizderdiń qoldaýylaryńyzǵa shyn júrekten rızamyz. Grýzııa xalqy ony aıqyn sezinip otyr ári joǵary baǵalaıdy. Osy ýaqytqa deıin kórsetip kelgen qoldaýlaryńyz úshin myń alǵys», - dedi Margvelashvılı.

Nursultan Nazarbaev óz kezeginde Qazaqstannyń Grýzııa ekonomıkasyna qarjy salyp jatqan iri ınvestor ekenin eske salyp, atalǵan ekonomıkalyq sharalardyń áli de jalǵasatynyn jetkizdi.