Nursultan Baıtilesov: Bir azamattyń qalaýy ekinshi azamattyń quqyǵyn shektemeýi tıis

ASTANA. KAZINFORM – Májilis depýtaty Nursultan Baıtilesov jańa Konstıtýtsııadaǵy zaıyrlylyq qaǵıdaty men azamattardyń quqyqtaryn qorǵaý máselelerin túsindirdi. 

– Biz jańa Konstıtýtsııa jobasynyń jetinshi babyna toqtalamyz. Biraq aldymen birinshi bapqa nazar aýdaraıyq. Onda Qazaqstan Respýblıkasy demokratııalyq, zaıyrly jáne quqyqtyq memleket dep jazylǵan. Bul jerde basty qundylyq – adam quqyqtarynyń qorǵalýy, - dedi ol «Referendým-2026» atty onlaın-marafonda.

Ol jetinshi baptyń mánin naqtylap, din men memlekettik qurylymnyń bólinetinin túsindirdi.

– Burynǵy 1995 jylǵy Konstıtýtsııadaǵy bappen salystyrǵanda qazirgi dinı uıymdardyń jáne aǵymdardyń aqparattyq múmkindikteri múldem ózgeshe. Árbir azamat óz senimine erikti túrde ıe bolýy tıis. Alaıda, eger dinı aǵymdardyń áreketi basqa azamattardyń densaýlyǵyna nemese quqyǵyna qaýip tóndirse, bul shektelýi kerek. Mysaly, eger bir azamat belgili bir dinı aǵymǵa kirse, ol óz áıelin nemese basqa azamatty májbúrlep sol aǵymǵa kirgize almaıdy. Bul – adamnyń quqyǵyn shekteý, - dedi Nursultan Baıtilesov. 

Depýtat atap ótkendeı, jańa Konstıtýtsııa jobasynda zaıyrlylyq qaǵıdatynyń naqty kórsetilýi – azamattardyń quqyqtaryn qorǵaýdyń mańyzdy qadamy.

– Bir azamattyń qalaýy ekinshi azamattyń quqyǵyn shektemeýi tıis. Bul – zaıyrly memlekettegi negizgi qaǵıdat jáne Konstıtýtsııanyń basty mániniń biri, - dedi ol.

Aıta keteıik, Kazinform agenttiginiń YouTube arnasynda «Referendým-2026» atty onlaın-marafonyn tikeleı efırde kórsetip jatyr. Saǵat 12:00-de bastalǵan onlaın-marafon saǵat 18:00-ge deıin jalǵasady dep josparlanǵan.