Nursultan Avstrııada jeńis týyn jelbiretti
QYZYLORDA. QazAqparat-Jaqynda Avstrııanyń Leıbnıts qalasynda dzıýdodan jastar arasynda Eýropa kýbogy úshin jarystar ótti.
Osy dúbirli dodaǵa el namysyn qorǵaýǵa Qazaqstan jastar quramasy atynan 30 sportshy attansa, olardyń arasynda Syrdarııa aýdanynan Nursultan Seráli de bar, dep habarlaıdy QazAqparat.
60 keli salmaqta synǵa túsken jerlesimiz Eýropada top jaryp, Týymyzdy jelbiretti.
1997 jyly Besaryq aýylynda dúnıege kelip, Jalańtós Bahadúr atyndaǵy sportta daryndy balalarǵa arnalǵan mektep-ınternatynda Qazaqstannyń eńbek sińirgen jattyqtyrýshylary Qalen Qalıuly men Rıshat Býrlovtan tálim alǵan Nursultan bolashaǵynan úmit kúttiretin sportshylardyń biri.
Aıta keteıik, ótken aptada ótken Eýropa kýbogynda qazaqstandyq quramanyń músheleri barlyǵy eki altyn, bir kúmis jáne eki qola medaldar jeńip aldy.
Básekege álemniń 28 elinen 500-den astam sportshy qatysty.
