Nursultan Altynbek World Boxing aıasynda álem kýbogyn jeńispen bastady

ASTANA. KAZINFORM - Qazaqstandyq Nursultan Altynbek (55 keli) Brazılııada ótip jatqan bokstan World Boxing aıasynda álem kýbogynyń birinshi kezeńin jeńispen bastady.

Alǵashqy jekpe-jeginde ol brazılııalyq Mıhael Trınıdadpen qolǵap túıistirdi. Jekpe-jek barysynda otandasymyz jınaqy qımyl kórsetti. Qarsylasyna kóbirek soqqy jumsaýǵa tyrysty. Nátıjesinde qarsylasyn qapy qaldyryp, shırek fınalǵa joldama aldy.

Atalǵan jarysta elimizdiń erler quramasynan taǵy jeti boksshy sharshy alańǵa shyǵady. Olardyń qatarynda Nurzat Ońǵarov (50 keli), Talǵat Syrymbetov (60 keli), Almat Ábdýáli (65 keli), Darhan Dúısebaı (70 keli), Dıas Moljigitov (80 keli), Dáýlet Tólemisov (85 keli) jáne Danııal Saparbaı (90 keliden joǵary) bar.

Al áıelder quramasynan Jazıra Oraqbaeva (51 keli), Anıta Ádisheva (54 keli), Uljan Sársenbek (57 keli) el namysyn qorǵaıdy.