Nursáýle Musaeva: Prezıdent Jarlyǵy - qarapaıym halyqtyń kóńilinen shyǵatyn asa quptarlyq is

QYZYLORDA. QazAqparat - QR Prezıdenti Qasym-Jomart Toqaevtyń kóp balaly analardyń qaryzdaryn azaıtý jónindegi Jarlyǵy qarapaıym halyqtyń kóńilinen shyǵatyn asa quptarlyq is. Bul der kezinde qolǵa alynyp otyr, - degen pikir bildirdi Qyzylorda oblystyq Analar keńesiniń tóraıymy Nursáýle Musaeva QazAqparat tilshisine.

Esterińizge sala ketelik, búgin QR Prezıdenti Qasym-Jomart Toqaev kópbalaly analardyń qaryzdaryn azaıtý týraly Jarlyqqa qol qoıdy .

Onyń aıtýynsha, kóp balalarǵa arnalǵan bul qamqorlyq turmysy tómen otbasylardy qoldaýǵa baǵyttalǵan. Alǵan nesıeni qaıtara almaý saldarynan qıyn jaǵdaıda qalǵan kóp balaly analardy qoldaý baǵytynda memleket tarapynan osyndaı ıgi qadam jasaldy.

«Dúnıe júzindegi kóptegen memleketterde mundaı qamqorlyq jasala bermeıdi. Bizdiń elimizde búgingi kúnge deıin turmysy tómen otbasylardy qoldaý baǵytynda kóptegen jobalar júzege asyp jatqany belgili. Atap aıtqanda, mundaı otbasylardyń baspanaly bolýyna, túrli járdemaqy taǵaıyndalýyna barlyq jaǵdaı jasaldy. Sondyqtan búgingi almaǵaıyp zamanda memleket tarapynan taǵy da osyndaı qoldaý kórsetilýi halyqtyń áleýmettik jaǵdaıyn jaqsartýdaǵy ıgi qadamnyń biri», - dedi N.Musaeva.

Ol nesıe alýǵa baılanysty halyqtyń qarjylyq saýattylyǵyn arttyrý qajettiligin atap ótti. Jalpy, bul máselege baılanysty árbir otbasynyń esebi bolýy tıis.

«Árbir otbasy memleket tarapynan beriletin járdemaqyǵa arqa súıep otyrý degen túsinikten arylǵany durys. Eńbek etý arqyly otbasy qarjysyn molaıtýǵa mán bergeni jón. Mundaı jaǵdaı bolmaǵan kezde olar qarjylyq qıyndyqqa dýshar bolady. Sondyqtan aldaǵy ýaqytta el arasynda osy baǵytta nasıhat jumystaryn júrgizgenimiz abzal», - dedi Nursáýle Musaeva.