«Nurotandyqtar bir mıllıonǵa jaqyndady» - respýblıkalyq basylymdarǵa sholý
***
«Atys-shabysqa toly sheteldik shytyrmandardy kóre-kóre mezi bolǵan, ulttyń rýhyn oıatatyn naǵyz ónerge sýsap júrgen qalyń kórermenin erekshe kóńil-kúıge bólegen rejısser Aqan Sataevtyń «Jaýjúrek myń bala» tarıhı dramasy 6 shilde kúni 10.30-da «Habar» telearnasy arqyly kórsetiledi! Bul jaǵymdy jańalyqty Astana kúnine jasalǵan tartý dep qabyldaýǵa ábden bolady. Óıtkeni, prokatka jańa shyqqan, kınoteatrlardaǵy kórsetilimi tabysty ótip jatqan tolyqmetrajdy fılmniń ystyq-sýyǵy basylmaı jatyp, ile teledıdar arqyly kórsetilýi bizdiń elimizde tuńǵysh ret júzege asyrylǵaly otyr», dep jazady «Egemen Qazaqstan» gazeti búgingi sanyndaǵy «Jaýjúrek myń bala» 6 shildede «Habar» telearnasynda kórsetiledi!» degen taqyryptaǵy materıalynda.
Keshe Astana qalasyndaǵy Ulttyq kardıohırýrgııalyq ǵylymı ortalyqta elimizdiń bas kardıohırýrgi doktor ıÝrıı Vladımırovıch Pıa germanııalyq áriptesterimen birge postkeńestik keńistikte buryn-sońdy jasalmaǵan otany júzege asyryp, donor júregine muqtaj syrqatqa jasandy júrekti ımplantatsııalady. Bul - álemdegi osyndaı úshinshi ota. Alǵashqy ota - Germanııada, ekinshisi - AQSh-ta jasalǵan bolatyn. Endi mine, úshinshi ota bizdiń elimizde júzege asyrylyp otyr. Osy jaıt arqaý bolǵan aqparat «Egemen Qazaqstan» gazetinde «Álemdegi úshinshi ota» degen taqyryppen basyldy. «Jasandy júrek júrek-qan tamyrlary aýrýlarynyń aýyr túrine shaldyqqan Astana qalasynyń 61 jasar turǵynyna qondyryldy», -dep jazady basylym.
***
«Aıqyn» gazetiniń jazýynsha, elimizdegi jetekshi partııa músheleriniń sany 1 mıllıonǵa jaqyndady. «Nur Otan» partııasynyń qataryna keshe qabyldanǵan jańa múshelerge partbıletterin tapsyrý kezinde, Erlan Qarın osylaı málimdedi. Partııa hatshysynyń aıtýynsha, partııa músheleri qatarynyń jyl ótken saıyn kóbeıýi, buqara halyqtyń Memleket basshysyna jáne «Nur Otan» partııasyna degen senimderiniń belgisi. «Biz durys saıasat ustanyp, durys baǵytqa jelken kerip otyrmyz. Halyq bizben birge bolǵysy jáne bizdi qoldaǵysy keledi. Byltyr partııa quramynda 800 myń adam bolsa, aǵymdaǵy jyldyń maýsym aıynda partııa músheleriniń sany 900 myńnan asyp, mıllıondyq mejege bet burdy. Sońǵy bir jarym jyl kóleminde 80 myń qazaqstandyq partııa qataryna qabyldandy»,-dedi bılik partııasynyń ókili. Maqala «Nurotandyqtar bir mıllıonǵa jaqyndady» degen taqyryppen berildi.
«Aıqyn» gazetiniń sársenbilik sanyndaǵy «Kýrchatov ǵylym qalasy atanbaq» degen taqyryptaǵy maqalasynda ShQO ákimi Berdibek Saparbaev aımaqtaǵy Kýrchatov qalasyna ǵylym qalasy mártebesin berýdi usynǵany jaıynda jazylǵan. Bul jóninde aımaq basshysy oblystyq máslıhat sessııasynda málimdedi. «Shyǵys Qazaqstan oblysynda Kýrchatov qalasy osyndaı mártebege laıyqty. Atalǵan shahar buryn da ǵylymnyń oshaǵy bolǵan. Bilim jáne ǵylym mınıstrliginde Kýrchatovqa osyndaı mártebe berý máselesine qatysty jumys toby quryldy»,-deıdi B. Saparbaev.
***
«Alash aınasy» gazetinde «Qant dıabetiniń aldyn alý úshin ne isteý kerek?» degen taqyryppen maqala basyldy. «Qazir qant dıabetimen aýyratyn naýqastar men odan qaıtys bolyp jatqandardyń sany qalada da, aýylda da ósip jatyr. Qaıtys bolý nemese osy aýrýdyń saldarynan jas kezinde eńbek qabiletin joǵaltý, bul tek qana jeke adamnyń qaıǵysy emes, bul - memleket úshin úlken áleýmettik-ekonomıkalyq shyǵyn. Óıtkeni bul aýrýmen adamdar eń bir belsenip jumys isteıtin shaǵynda aýyryp, múgedek bolyp qalady. Qazir qant dıabetimen aýyratyn naýqastar tegin emdeledi»,- dep jazady basylym.
***
«Ońtústik óńirdiń jer óńdeýshileri Astana kúnine oraı elordalyqtar úshin azyq-túlik kerýenin baǵyttady»,-dep jazady «Kazahstanskaıa pravda» gazeti «Karavan dlıa Astany» degen taqyryppen jarııalanǵan maqalasynda. 18 úlken júk kólikteri sapynan jasaqtalǵan bul kerýende Astanaǵa kókónis, jemis-jıdek, qus eti, aýyl sharýashylyǵy ónimderiniń basqa da taýarlary jóneltildi. Jalpy, elordaǵa kele jatqan bul ónimniń salmaǵy 200 tonnaǵa jýyq. Elorda turǵyndarynyń bul ónimderi bazardaǵy baǵaǵa qaraǵanda eki ese tómen baǵamen satyp alý múmkindikteri bar.
