Nurotandyqtar Azıada qarsańynda Ulttyq qurama sportshylaryna sáttilik tiledi
ALMATY. 27 qańtar. QazAqparat /Erbol Turymbetov/ - Búgin «Nur Otan» HDP Almaty qalalyq fılıaly Almatydaǵy 7-Qysqy Azııa oıyndaryn uıymdastyrý komıtetiniń shtabynda Qazaqstan ulttyq quramasyn qoldaýǵa arnalǵan jıyn ótkizdi.
Otyrys barysynda «Nur Otan» HDP Almaty qalalyq fılıaly basshylyǵy men qazaqstandyq sport ardagerleri ulttyq qurama sportshylarynyń jeńiske jetýine aq tilekterin bildirdi. «Elimizde tuńǵysh ret ótkizilgeli otyrǵan qurlyqtyq aýqymdaǵy dodada el sportshylarynyń tek jeńis bıikterinen kórinýlerin tileımiz. Bizdiń aǵa býyn sportshylarymyzdyń jeńisti jolyn búgingi urpaq ta jalǵastyrady dep senemiz», - dedi «Nur Otan» HDP Almaty qalalyq fılıaly tóraǵasynyń birinshi orynbasary Mahambet Beıdáli.
Óz kezeginde KSRO-nyń qurmetti sport sheberi, aýyr atletıkadan álem rekordshysy Vladımır Dreksler de Ulttyq qurama múshelerine jeńisti jol tilep, jıynǵa qatysýshylardy sportshylarymyzǵa qyzý qoldaý kórsetýge shaqyrdy.
Shara sońynda M. Beıdáli ardager sportshylarǵa jeńis nyshanyn bildiretin estelik belgi tabys etti.
