Nurotandyqtar «Almaty-Bishkek» tasjolynyń qurylys jumystarymen tanysty

TALDYQORǴAN.QazAqparat - Búgin Almaty oblysynyń Jambyl aýdanyna «Nur Otan» partııasy partııalyq baqylaý qyzmetiniń basshylyǵy issaparmen keldi, dep habarlaıdy QazAqparat tilshisi.

Jumys sapary barysynda Jambyl aýdanyndaǵy respýblıkalyq mańyzdy «Almaty-Bishkek» tasjolynyń 63-101 shaqyrymynda júrgizilip jatqan jóndeý jumystarymen tanysty. «Qutty meken» ulttyq jobasynyń Jetisý óńirinde júzege asyrylýymen tanystyrý maqsatynda oblystaǵy mańyzdy nysandar men tasjoldardyń qurylysy jaıynda arnaıy bılbordtar men aqparattyq taqtaıshalar ornatyldy.

«Qutty meken» jobasynyń basty maqsaty - jergilikti jerlerde ınfraqurylymdy nyǵaıtý, ınjenerlik jáne áleýmettik ınfraqurylymdy damytý, gaz, sý qubyry, elektrmen qamtamasyz etý jumystaryn júrgizýdi jáne kishi, monoqalalardy damytý jumystaryn jalǵastyrý. Joba aıasynda jumysshy top jasaqtalyp, arnaıy Jol kartasyn ázirlendi. «Nurly jol», «Nurly jer», memlekettik jáne úkimettik baǵdarlamalar aıasynda oblystyń depýtattyq fraktsııasy janyndaǵy turaqty bes komıssııanyń músheleri, Elbasynyń Bes áleýmettik bastamasy aıasynda qurylǵan qoǵamdyq keńestiń, oblystyq fılıaldyń partııalyq baqylaý komıssııasynyń músheleri Ulttyq qordan bólinetin qarajattyń tıimdi paıdalanýyna baqylaý júrgizetin bolady», - dep túsindirdi partııalyq baqylaý qyzmetiniń basshysy Dáýren Bıjumanov.

Óńirde joba aıasyda atqarylyp jatqan jumystarmen oblystyq partııa fılıaly tóraǵasynyń orynbasary Gúlnar Toılybaeva tanystyrdy.

«Nurly jol» baǵdarlamasy aıasynda 116 jobanyń júzege asyrylýyna 92,6 mlrd.teńge qarajat bólindi. Olardyń 85-i qoldanysqa engizildi, 31-i júzege asyrylýda. «Nurly jer» memlekettik baǵdarlamasy aıasynda aǵymdaǵy jyly 101 jobanyń júzege asyrylýyna 17,8 mlrd.teńge qarajat bólindi. 2019 jyly oblys boıynsha 784,5 myń sharshy metr baspana berilýi josparlanyp otyr.

«2019 jyly transporttyq ınfraqurylymdy damytý úshin 12,3 mlrd.teńge qarajat qarastyryldy. 3,2 mlrd.teńge - 3 avtomobıl jolynyń qaıta qalpyna keltirýine, 9 mlrd. teńge jol jóndeý jumystarynyń qosymsha 27 jobasyna bólingen qarajat», - dedi óz sózinde Gúlnar Qojaǵulqyzy.

Reıdke partııalyq baqylaý qyzmetiniń basshysy Dáýren Bıjumanov, partııalyq baqylaý qyzmetiniń ınspektory Nurlan Baımurzaev, oblystyq fılıal tóraǵasynyń orynbasary Gúlnar Toılybaeva, oblystyq fılıaldyń partııalyq baqylaý jónindegi ınspektory Eleonora Taldanbaeva, Jambyl aýdandyq partııa fılıalynyń tóraǵasy, aýdan ákimi Baǵdat Álıev, partııa fılıaly tóraǵasynyń birinshi orynbasary Yqylas Amalbek qatysyp, óz usynystary men jobaǵa qatysty pikirlerin bildirdi.

Jol qurylysyna qatysty partııalyq baqylaý qyzmeti basshylyǵy tarapynan birqatar syn-eskertýler aıtyldy.