Nurmahan Tinálıev el birinshiliginde utylyp qaldy

Búgin Shymkentte grek-rım, erkin jáne áıelder kúresinen Qazaqstan chempıonaty bastaldy. Naýryz aıynyń 1-ne deıin sozylatyn básekege elimizdiń 14 oblysy men 2 qalasynan 600-ge jýyq sportshy qatysýda. Jarysty birinshi bolyp, grek-rım kúresiniń balýandary bastady. Alaıda, eki birdeı Olımpıada oıyndaryna qatysqan Numahan Tinálıev alǵashqy kúni jeńilis tapty.

Jaqynda grek-rım jáne erkin kúresten Qazaqstan quramasynyń bas bapkerleri aýysqan bolatyn. Grek-rım kúresine elimizge belgili bapker Nurym Dúısenov kelse, erkin kúres balýandaryn Áset Serikbaev jattyqtyrady. Qos bapker de osy Qazaqstan chempıonatynan keıin úzdikterdi iriktep alyp, el namysyn qorǵaıtyn ulttyq quramany jasaqtaıdy.

Jarystyń alǵashqy kúni grek-rım kúresiniń balýandary 59, 71, 75, 98, 130 keli salmaq dárejelerinde jeńimpazdar men júldegerlerdi anyqtady. Eń jeńil salmaqta, ıaǵnı, 59 kelide aqtóbelik Meırambek Aınaqulovtyń mereıi ústem boldy. Meırambek altyn medal úshin bolǵan beldesýde qyzylordalyq Aıdos Sultanǵalıdi 4:1 esebimen jeńdi. Qola medal jambyldyq Janserik Sársenbıev pen Aqmola oblysynyń namysyn qorǵaǵan Damır Zarlyhanovqa buıyrdy. 2016 jyly Tarazda ótken Qazaqstan chempıonatymen salystyrǵanda 59 keli salmaqta aıtarlyqtaı ózgerister bar. Máselen, byltyr el chempıonatynda osy salmaqta jambyldyq Dastan Óskenbekov top jarǵan. Byltyr jeńimpaz ben júldeger atanǵan balýandardyń ishinen bıyl Janserik Sársenbıev júlde aldy. Jambyldyq balýan Tarazdaǵy tartysta qola medalǵa ıe bolǵan-dy.

71 keli salmaqta barlyǵy 21 balýan beldesti. Bul salmaqtyń altyn medaldan birden-bir úmitker retinde Almaty oblysynan kelgen Demeý Jadyraevtyń aty jıi atalyp edi. Alaıda, Demeý  fınaldyq básekede súrinip, kúmis medaldy qanaǵat tutty. Demeýdiń osal tusyn tapqan - Ábýnasyr Ómirzaq. Jambyldyq balýan byltyrǵy Qazaqstan chempıonatynda kúmis medaldi mise tutyp edi. Bul joly kúmisin altynǵa aıyrbastap, el chempıony atandy.

75 keli salmaqta kileń tájirıbeli balýandar bas qosty. Talaı halyqaralyq jarystarda el qorjynyna júlde salǵan Aıbek Eńsehanov, Darhan Baıahmetov, Maqsat Erejepov syndy balýandar osy salmaqta ekeni barshamyzǵa belgili. Sonymen qatar, byltyr jastar arasynda álem chempıony atanǵan Tamerlan Shadýkaev ta 75 keli salmaqta kúsh synasýdy uıǵarypty. Jas balýannyń eresekter arasyndaǵy alǵashqy talpynysy jaman emes. Ózinen áldeqaıda tájirıbeli balýandardy tize búktirgen Tamerlan fınalda Maqsat Erejepovke ǵana ese jiberdi. Darhan Baıahmetov, Aıbek Eńsehanov syndy jigitter Qazaqstan chempıonatynyń qola júldegerleri atandy.

98 kelide kúresken balýandardyń arasynan ońtústikqazaqstandyq Álimhan Syzdyqov oq boıy ozyq shyqty. Fınalda ol Almaty oblysynan kelgen Jasulan Sydyqovtan basym tústi. Bul salmaqtaǵy qola medaldar Qaraǵandynyń qos balýany - Erulan Ysqaqov pen Erkin Shaıkenovke buıyrdy.

130 keli salmaqta Nurmahan Tynálıevtiń top jaratynyna jankúıerler senimdi edi. Biraq, barlyǵy biz oılaǵandaı bolmady. Fınalda Ońtústik Qazaqstan oblysynyń namysyn qorǵaǵan Damır Kúzenbaev Nurmahandy 4:0 esebimen utyp, Qazaqstan chempıonatynyń jeńimpazy atandy. Damır byltyrǵy chempıonatta da qarsylas shydatpap edi. Biraq, ol kezde Nurmahan jarysqa qatyspaǵan-dy.

Erteń grek-rım kúresinde taǵy 3 salmaqta (66, 80, 85) jeńimpazdar men júldegerler anyqtalady. Sondaı-aq, boıjetkender de 4 salmaq (48, 58, 60, 69) boıynsha saıysqa túsedi.

Kúres túrlerinen ótip jatqan Qazaqstan chempıonatynyń 1-shi kúngi nátıjeleri:

Grek-rım kúresi:

59 kg

1. Meırambek Aınaqulov (Aqtóbe obl.);

2. Aıdos Sultanǵalı (Qyzylorda obl.);

3. Janserik Sársenbıev (Jambyl obl.);

3. Damır Zarlyhanov (Aqmol obl.);

71 kg

1. Ábýnasyr Ómirzaq (Jambyl obl.);

2. Demeý Jadyraev (Almaty obl.);

3. Aıdos Muqan (Qyzylorda obl);

3. Magomed Chýhalov (OQO);

75 kg

1.Maqsat Erejepov (Atyraý obl.);

2.Tamerlan Shadýkaev (Qostanaı obl.);

3.Darhan Baıahmetov (ShQO);

3.Aıbek Eńsehanov (ShQO);

98 kg

1. Álimhan Syzdyqov (OQO);

2. Jasulan Sydyqov (Almaty obl.);

3. Erkin Shaıkenov (Qaraǵandy obl.);

3. Erulan Ysqaqov (Qaraǵandy obl.);

130 kg

1. Damır Kúzenbaev (OQO);

2. Nurmahan Tinálıev (Almaty obl.);

3. Mansýr Shadýkaev (Qostanaı obl.);

3. Talǵat Jıentaev (Qostanaı obl.);