Nurmahan Ádilbekov Memlekettik múlik jáne jekeshelendirý komıtetiniń tóraǵasy bolyp taǵaıyndaldy

Vedomstvo málimetinshe, tıisti buıryqqa Qarjy mınıstri 2026 jylǵy 1 maýsymda qol qoıǵan.

Nurmahan Ábilqasymuly 1973 jylǵy 19 aqpanda Ońtústik Qazaqstan oblysynda dúnıege kelgen. 1994 jyly Qazaq memlekettik basqarý akademııasyn, 2004 jyly Qazaq gýmanıtarlyq zań ýnıversıtetin támamdaǵan.

Eńbek jolyn 1994 jyly Shymkent oblysyndaǵy «Pobeda» maqta ósirý sovhozynda bastaǵan. Keıin 1995 jyldan 2010 jylǵa deıin Memlekettik múlik jáne jekeshelendirý komıtetinde túrli qyzmetter atqardy.

2014-2020 jyldary «Aqparattyq-esepteý ortalyǵy» AQ-da ártúrli laýazymdarda jumys istedi.

2020-2022 jyldary Memlekettik múlik jáne jekeshelendirý komıtetiniń Respýblıkalyq menshik obektilerin satý jáne jekeshelendirýden keıingi baqylaý basqarmasyn basqardy.

– 2022 jyldan bastap 2024 jylǵa deıin Qazaqstan Respýblıkasy Memlekettik múlik jáne jekeshelendirý komıtetiniń Shymkent memlekettik múlik jáne jekeshelendirý departamentiniń basshysy qyzmetin atqardy. Al 2024 jyldan beri QR Qarjy mınıstrligi Memlekettik múlik jáne jekeshelendirý komıteti tóraǵasynyń orynbasary boldy, – dep habarlady vedomstvo.

Eńbek jolynda memlekettik basqarý jáne memlekettik múlikti basqarý salasynda mol tájirıbe jınaqtaǵan maman birqatar memlekettik nagradalarmen marapattalǵan.

Atap aıtqanda, 2001 jyly «Qazaqstan Táýelsizdigine 10 jyl», 2016 jyly «Qazaqstan Táýelsizdigine 25 jyl» mereıtoılyq medaldaryn alǵan.

Sondaı-aq 2020 jyly «Qarjy qyzmetiniń úzdigi» tósbelgisimen, 2021 jyly «Qazaqstan Respýblıkasynyń Qarjy mınıstrligine 100 jyl» jáne «Qazaqstan Respýblıkasy Qarjy mınıstrligi Memlekettik múlik jáne jekeshelendirý komıtetiniń qurylǵanyna 30 jyl» mereıtoılyq belgilerimen marapattalǵan.

2023 jyly Nurmahan Ádilbekov Qazaqstan Respýblıkasynyń «Qurmet» ordenimen marapattaldy.

Aıta keteıik, Ádil Qusmanov Strategııalyq josparlaý jáne reformalar agenttigi tóraǵasynyń orynbasary boldy.