«Nurly joldyń» ekinshi kezeńi ekonomıkaǵa tyń serpin beredi - Súıindik Aldashev

NUR-SULTAN. QazAqparat - Prezıdent Qasym-Jomart Kemeluly Toqaevtyń Qazaqstan halqyna Joldaýy – kókeıdegi kóp suraqqa jaýap bergen mańyzdy qujat. Bul týraly Parlament Senatynyń depýtaty Súıindik Aldashev málim etti, dep habarlaıdy QazAqparat.

«Joldaý - elimizdiń jańa jaǵdaıdaǵy damý baǵdarlamasy. Joldaýda áleýmettik, ekonomıkalyq, ıdeologııalyq, mádenı, rýhanı máseleler túgel eskerilgen. Kóptegen turalap turǵan túıtkilderdi oń sheshýge arnalǵan josparlar aıqyndaldy.

Erekshe atap óter jaıt, Memleket basshysy ekonomıkalyq damýǵa basa mán berdi. Birqatar jobany qaıta jandandyrý jaıyn aıtyp, naqty mindetter qoıdy. Mysaly, osyǵan deıin nátıjeli júzege asyrylǵan «Nurly jol» kólik-tranzıtti baǵdarlamasy Azııa men Eýropany tikeleı baılanystyra otyryp, memleketimizdiń halyqaralyq reıtıngterde alǵa shyǵýyna jol ashqan joba», - dedi S. Aldashev.

Osy oraıda depýtat elimizdiń kólik tranzıttik sektoryna toqtaldy.

«Degenmen, qazirgi tańda dál osy iri jobaǵa básekeles bolatyn ózge halyqaralyq tájirıbeler eskerilip, «Nurly joldyń» ekinshi kezeńin áldeqaıda damyǵan deńgeıde jalǵastyrý týraly tapsyrma berildi. Demek, 2025 jylǵa deıin elimizdiń kólik tranzıttik sektor boıynsha kóshbasshy pozıtsııasyn saqtap qalý mindet etip qoıyldy. Bul elimizge jańa halyqaralyq seriktestermen tyǵyz baılanys ornatyp, qyzmet kórsetý sapasynyń jańa deńgeıge kóterilýine sep bolady dep senemiz. Sondaı-aq, atalǵan ıgi joba ekonomıkalyq damýymyzǵa da tyń serpin bereri sózsiz», - dedi senator.