«Nurly joldaǵy» ıdeıalardy stýdentterimiz bolashaqta paıdalanatynyna esh kúmánim joq - Brazılıa Ýnıversıtetiniń rektory

ASTANA. QazAqparat - Qazaqstan Respýblıkasynyń Brazılııadaǵy Elshiliginiń jáne Latyn Amerıkasyndaǵy belgili joǵary oqý ornynyń bastamasymen «UNB» Brazılıa Ýnıversıtetinde Qazaqstan Respýblıkasynyń Brazılııadaǵy Elshisi Baqytjan Ordabaev QR Prezıdenti Nursultan Nazarbaevtyń «Nurly jol - bolashaqqa bastar jol» atty Qazaqstan halqyna arnalǵan Joldaýymen tanystyrý maqsatynda arnaıy dáris ótkizdi.

Bul týraly QR SІM baspasóz qyzmetinen habarlady.

24 qarashada bolǵan semınarǵa Brazılııanyń Syrtqy baılanystar mınıstrliginiń jáne basqa da memlekettik organdardyń ókilderi, Brazılıa qalasynda tirkelgen dıplomatııalyq mıssııalardyń basshylary men ókilderi, ǵylym qaıratkerleri, Brazılıa qalasynyń jáne Federaldyq kóptegen joǵary oqý oryndarynyń professorlary, «UNB» stýdentteri jáne Brazılııanyń BAQ ókilderi qatysty.

Elshi B.Ordabaev óz sózinde qatysýshylardy QR Prezıdenti Joldaýynyń basty qaǵıdalarymen tanystyra otyryp, Qazaqstan týraly jan-jaqty habardar etti.

Dıplomat Qazaqstan búgingi tańda óziniń kópvektorly syrtqy saıasatynyń arqasynda joǵary halyqaralyq qaýymdastyqta tanymal ekenin, onyń jaýapty ári bedeldi múshesi bolyp otyrǵanyn málimdedi. Sonymen qatar, Qazaqstan ǵalamdyq qarýsyzdandyrý jáne ıadrolyq qarýdy taratpaý salasynda kóshbasshylyq etip otyrǵanyn, sondaı-aq, mádenıet, álemdik dinder kóshbasshylary jáne órkenıet dıalogynyń moderatory bolyp tabylatynyn, onyń kezekti sezi 2015 jylǵy maýsym aıynda Astana qalasynda ótetiniń basa aıtty.

«UNB» Ýnıversıtetiniń rektory Ivan Kamargo, óz kezeginde qazaqstandyq Elshiniń mazmundy baıandamasynyń arqasynda joǵary oqý ornynyń professorlyq-oqytýshylar quramy Qazaqstannyń kezekti mańyzdy bastamasymen tanysýǵa tikeleı múmkindik alǵandaryn jetkizdi. «Búgin biz QR Memleket basshysynyń joldaýymen tanysýǵa múmkindik aldyq, meniń oıymsha, bul Prezıdenttiń búgingi álemdik ahýalda Qazaqstannyń áleýmettik jáne ekonomıkalyq problemalardy sheshý joldaryn kórsetetin óz kózqarasyn jáne basty ıdeıasyn jetkizetin mańyzdy qujat. Búgingi semınarǵa kelip otyrǵan azamattar, Ýnıversıtettiń qyzmetkerleri men stýdentteri bul qujatpen qanaǵattanarlyqpen tanysyp, onyń ishindegi bastamalar men jańa ıdeıalardy ózderiniń bolashaq isterinde paıdalanatynyna esh kúmánim joq»,- dedi.

Іs-sharanyń sońynda Elshi B.Ordabaev osy sııaqty sharalardyń ótkizilý ereksheligi men mańyzdylyǵyn atap ótti, sondaı-aq semınarǵa belsendi qatysqandaryna jáne tıisti qoldaý kórsetkenderine óz alǵysyn bildire otyryp, olarǵa Elshilik tarapynan daıyndalǵan QR Prezıdenti Nursultan Nazarbaevtyń «Nurly jol - bolashaqqa bastar jol» atty Qazaqstan halqyna arnalǵan Joldaýynyń portýgal tilindegi kitapshalaryn tapsyrdy.