Nurly jol: Joldardy jóndeýge 3,5 trln teńge bólindi

NUR-SULTAN. QazAqparat – QR Indýstrııa jáne ınfraqurylymdyq damý mınıstri Beıbit Atamqulov respýblıkalyq joldardyń qurylysyna qatysty málimet berdi, dep habarlaıdy QazAqparat tilshisi.

2020-2025 jyldarǵa «Nurly jol» baǵdarlamasynyń jalpy bıýdjeti 5,5 trln teńgeni qurap otyr. Onyń ishinde avtojol salasynyń bıýdjeti 3,5 trln teńge shamasynda.

«Avtojol salasynyń bıýdjetinen respýblıkalyq joldardy qaıta salý men qurylysqa 2,1 trln teńge bólindi. 2020 jylǵa deıin 13 myń shaqyrymda qaıta salý jumystary júrgizildi. 2025 jylǵa deıin qosymsha 11 myń shaqyrym jasparlanǵan, ıaǵnı jalpy 24 myń shaqyrym qamtylǵan. Bıyl 4 myń shaqyrym jolda qurylys jumystary júrip jatyr», - dedi mınıstr Úkimet úıindegi baspasóz máslıhatynda.

Onyń aıtýynsha, jol boıyndaǵy servıs nysandaryna respýblıkalyq bıýdjetten qarjy bólý qarastyrylmaǵan.

«Jol boıyndaǵy servıs nysandary ınfraqurylymyn qurý úshin 651 alań bólindi. Bul baǵytta bıznespen jáne jergilikti atqarýshy organdarmen birlese jumys isteýdemiz. 2025 jylǵa deıin tıisti nysandar salynady dep josparlap otyrmyz», - dedi B. Atamqulov.

Aıta keteıik, búgingi baspasóz máslıhatynda Úkimet basshysynyń orynbasary Roman Sklıar aldaǵy 5 jylda respýblıkalyq joldardyń 100 paıyzy qalpyna keltirilip, jańartylatynyn málim etti. Sondaı-aq jol boıynda servıstik ınfraqurylymdy qurý jumystary aıaqtalady.