«Nurly jol» jańa vokzalyna alǵashqy poıyzdar kele bastady
Asa jaıly «Saryarqa» elektr poıyzymen elordasyna alǵashqy 200-den astam jolaýshy kelip jetti.
Poıyzdyń aǵa jolserigi Laýra Járkenovanyń aıtýynsha, «biz jolaýshylarǵa poıyzdyń jańa vokzalǵa turaqtaıtyndyǵyn aldyn ala aıttyq. Shyndyǵyn aıtý kerek, jańa vokzalǵa alǵashqy bolyp keletindigimizge qýanǵanymyzben biz qatty qobaljydyq. Este qalarlyqtaı tarıhı oqıǵa boldy».
Jolseriktiń aıtýynsha, «Qaraǵandy -Astana» baǵdaryndaǵy jańa jyljymaly quramynda jolaýshylarǵa barlyq qolaıly jaǵdaı jasalǵan. Vagondarda aýa baptaǵysh, jolaýshylar aǵynyn tirkep, saraptap otyrý úshin beıne baqylaý júıesi ornatylǵan».
L. Járkenovanyń aıtýynsha, jolaýshylar ekologııalyq bıotýalet kesheni, múmkindigi shekteýli jandarǵa arnalǵan kótergish qondyrǵylary da bar.
Balqashtan kelgen Júsipovter otbasy jańa vokzalǵa kelip kirgenderine qýanyshtaryn jasyrmady.
«Biz Astanada jańa úlgidegi vokzal salynyp jatqandyǵyn teledıdardan kórip, estip júrdik. Biraq osynshalyqty ǵajaıyp ekendigin alǵashqylardyń biri bolyp óz kózimizben kórdik. Munda biz jańa úlgidegi poıyzben keldik. Vokzal ǵajaıyp úlken eken. Barlyǵy da jańa tehnologııa boıynsha salynǵan. Bizdiń oıymyzsha, EKSPO-2017 qonaqtaryn laıyqty qarsy alady»,-deıdi M. Júsipov.
Vokzal kesheni bastyǵynyń kezekshi kómekshisi E. Rymbaevtyń aıtýynsha, munda jumys jasaý jas mamandar úshin óz múmkindigin barynsha kórsetýge yńǵaıly.
«Biz arnaıy daıyndyqtan óttik. Barlyq sheteldik qonaqtarǵa tıisti aqparattardy túsindire alamyz. Temirjol salasynda qyzmet etip, jolaýshylarǵa qyzmet kórsetý sapasyn kóterý bizder úshin úlken jaýapkershilik júkteıdi»,-deıdi E. Rymbaev.
Búgin, 1 maýsymda jańa vokzal keshenine Pavlodar, Mańǵystaý jolaýshylar poıyzdary kelip toqtasa, osy stantsııadan Shymkent, Kókshetaý, Almaty baǵdaryna poıyzdar jiberildi.
Jańa vokzal kesheni 54 poıyzǵa qyzmet kórsetedi. Onyń 22-si «Tulpar-Talgo» júrdek poıyzy, 16-sy qarapaıym poıyzdar, 16-sy qalaaralyq poıyzdar.
