«Nurly jol» Qazaqstannyń týrıstik áleýetin arttyrady - qytaılyq sarapshy
Bul týraly Qazaqstan-Qytaı ekinshi týrıstik forýmynda QHR Týrıstik zertteýler ınstıtýtynyń dırektory Daı Bın málim etti, dep habarlaıdy QazAqparat.
Onyń sózine qaraǵanda, elderdegi týrıstik naryqtarda baıqalatyn qubylmalylyq tıisti ınfraqurylymdy damytýǵa, vızalyq máselege, qyzmet kórsetý salasyna baılanysty. Osy oraıda Qazaqstannyń «Nurly jol» strategııasy men Qytaıdyń «Bir beldeý, bir jol» baǵdarlamasynyń mańyzy zor bolyp otyr.
«Búginde saıası ózara senimniń nyǵaıýy arqasynda «Lıanıýngan-Almaty» baǵdary boıynsha temir jol saparlary bastaldy, «Batys Eýropa - Batys Qytaı» avtomagıstraliniń qurylysy aıaqtalýda, «Qorǵas-Shyǵys qaqpasy» arnaıy ekonomıkalyq aımaǵy damyp keledi. Bizdiń elderdiń basshysylary 2017 jyldy Qazaqstandaǵy Qytaıdyń týrızm jyly dep jarııalady. Sondyqtan da ortaq jolymyzǵa týrıstik sektor da jańa serpin beretin bolady»,-dedi sarapshy.
Onyń aıtýynsha, bıylǵy qańtar-sáýirde 73 myń qazaqstandyq týrıst Qytaıǵa saparlap, ótken jylǵy sáıkes kezeńmen salystyrǵanda ósim 16,6 paıyz deńgeıinde baıqaldy.
«2016 jyly Qytaıǵa kelgen qazaqstandyq týrısterdiń jalpy sany 225 myń adamǵa jetti, osy rette tómendeý 6,7 paıyzdy qurady. Ótken jyly Qazaqstanǵa saparlaǵan qytaılyq týrıster sany 3,4 paıyzǵa artyp, 250 myń 790 adamǵa jetti. Aǵymdaǵy jyldyń bastapqy tórt aıynda bul kórsetkish shamamen 10 paızyǵa tómendedi. Sonymen qatar 2017 jyldyń qańtar-sáýirinde eki eldiń arasyndaǵy taýar aınalymy 30 paıyzǵa óskenin baıqap otyrmyz. Sondyqtan saıası, ınvestıtsııalyq jáne saýda-ekonomıkalyq salalarmen salystyrǵanda, týrızm baǵytyndaǵy yntymaqtastyq deńgeıi birshama tómen deńgeıde»,-dept atap ótti Daı Bın.
Bul turǵyda ol eldiń týrıstik áleýetin arttyrý úshin kóliktik ınfraqurylymnyń mańyzdylyǵyn sóz etti.
«2016 jyly Qazaqstan 3,2 myńnan astam shaqyrym joldy qaıta jasap shyqty. Azııa ınfraqurylymdyq ınvestıtsııalar banki, Jibek joly qory jáne ózge de qarjylyq ınstıtýttar Qazaqstandaǵy joldardy damytýǵa ınvestıtsııa salýǵa ázir. «Nurly joldyń» basty baǵyttarynyń biri sapaly joldardyń aýqymyn arttyrýǵa negizdelgen, bul óz kezeginde ishki jáne elge kiretin týrızmdi yntalandyrýǵa jol ashady. Osy oraıda adamdar avtobýstarmen nemese jeke kólikterimen eldi aralaýǵa kóbirek mán bere bastaıdy»,-deıdi sarapshy.
Budan bólek ol Qazaqstan men Qytaı halyqtarynyń ózara túsinistigi men ózara qyzyǵýshylyǵyn nyǵaıtýǵa QHR-daǵy Singer-2017 jobasyna Dımash Qudaıbergenniń qatysýy úlken úlesin qosqanyn atap ótti.
Esterińizge sala keteıik, Qazaqstan-Qytaı ekinshi týrıstik forýmy 2017 jyldyń 5 maýsymynda Beıjińde ótti. Oǵan Qazaqstannyń 60-tan astam aldyńǵy qatarly týrıstik operatorlary, al Qytaı tarapynan 300-den astam týrıstik kompanııalar qatysty. Birinshi forým ótken jyly kúzde Astanada uıymdastyrylǵan bolatyn.
2016 jyly QHR-dan álem elderine 135 mln qytaılyq týrıst saparlap, 261 mlrd dollar somasynda qarjy jumsaǵan kórinedi. Bul kórsetkish 2015 jylǵa qaraǵanda 12 paıyzǵa artyq.
