«Nurly jol»: Qaraǵandy oblysynda bólingen qarjy qaıda jumsaldy
«Kóliktik ınfraqurylymdy damytý» baǵyty boıynsha 24 jobany iske asyrý josparlanǵan. Bul - tasqyndy sýlar qıratqan tórt kópirdi qalpyna keltirý jáne oblystyq mańyzy bar kólik joldarynyń 350 shaqyrymyn ortasha jóndeýden ótkizý jumystary.
Qazirgi kezde Soqyr jáne Taldy ózenderi arqyly ótetin eki kópir paıdalanýǵa berildi. Nura ózenindegi kópir bıylǵy jyldyń sońyna deıin tapsyrylady.
Qulanótpes arqyly ótpejoldyń qurylysy jalǵasýda.
Joldardy ortasha jóndeý boıynsha barlyq jumystar merziminde oryndalǵan. Merdigerler asfalt tóselgen kúre joldardyń 151 shaqyrymyn retke keltirdi.
Sondaı-aq 2018 jyly Qaraǵandy qalasyndaǵy 4,5 shaqyrym jylý jelileri qaıta jóndeldi. Osynyń arqasynda oblys ortalyǵyndaǵy 1,5 myń turǵyn úı men 217 áleýmettik, mádenı-turmystyq nysanda jylýmen jabdyqtaý jaqsarǵan.
Budan basqa, oblys aýmaǵynda «Ortalyq-Ońtústik» kóliktik dáliz jobasyn iske asyrý jalǵasýda. 2019 jyldyń qazan aıynda jalpy uzaqtyǵy 15 shaqyrymdy quraıtyn Qaraǵandy-Temirtaý kúre joly ýchaskesin qalpyna keltirý jumystaryn aıaqtaý josparlanǵan.
Sondaı-aq Qaraǵandynyń Soltústik jáne Shyǵys aınalma joldarynyń qurylysy júrgizilip jatyr. Bıylǵy jyly bul maqsattarǵa 13,7 mlrd teńge bólingen.
«Aımaqtardy damytý-2020» baǵdarlamasynyń aıasynda 2018 jyly aýyzsýdy berý qyzmetterin sýbsıdııalaýǵa 686,4 mln teńge kóleminde qarjy bólindi. Bul somaǵa Qaraǵandy oblysynyń turǵyndar sany 658 423 adamdy quraıtyn 49 eldi mekeni aýyzsýmen qamtylǵan.
Sonymen birge, «Aýylda sý alý ǵımaratyn salý» jobasy boıynsha jobalyq-smetalyq qujattama ázirlengen. Qazirgi kezde joba memlekettik saraptamadan ótip jatyr. Onyń oń qorytyndysy shyǵarylǵannan keıin, ol «Aımaqtardy 2020 jylǵa deıin damytý» baǵdarlamasynyń aıasynda iske asyrylatyn bolady.
