«Nurly jol»: BQO-da eki respýblıkalyq jol jańǵyrtylady
«QazAvtoJol» UK» AQ BQO fılıalynyń dırektory Ámir Kárimbaevtyń óńirlik kommýnıkatsııalar qyzmeti alańynda ótken brıfıngide málim etkenindeı, Podstepnyı-Fedorov- RF shekarasy jáne Atyraý-Oral avtojoldaryn qaıta jańartý josparlanyp otyr.
Onyń aıtýynsha, Podstepnyı-Fedorov-RF shekarasy joly ótken ǵasyrdyń jetpisinshi jyldary salynǵan, óte qanattanǵysyz kúıde. Avtokólikter kóp júrgen (táýligine 3
myńnan astam avtokólik) kezde joldyń jekelegen bólikteri tórtinshi sanattaǵy parametrlerge jetedi. Oǵan qosa 15 shaqyrym jolda qatqyl tabandy asfalt tóselmegen.
«Kúni búgin memlekettik saraptamanyń oń qorytyndysy alynǵan. Joba aıasynda jol tósemi 9 metrge deıin keńeıtilip, úshinshiden ekinshi tehnıkalyq sanatqa kóshiriledi,
oǵan qosa 5 kólik jol aıryǵy men 5 kópir salý kózdelgen.
Qazirgi ýaqytta jobany júzege asyrý úshin qarjy kózin anyqtaý jumystary júrgizilýde», dedi Á.Kárimbaev.
Sol sekildi Atyraý-Oral jolyn 4 jolaqty qozǵalysy bar Іb tehnıkalyq sanatqa aýystyrý oılastyrylýda. Oraldan Atyraý oblysynyń shekarasyna deıin uzyndyǵy 303 shaqyrym joldy qaıta qurý úshin jobalyq-smetalyq qujattama daıyndalýda. Sondaı-aq uzyndyǵy 32 shaqyrym, eki jolaqty qozǵalysy bar Oral qalasynyń ońtústik-batys aınalma jolynyń da jobasy júzege asyrylmaqshy.
Sonymen qatar Reseımen shekaradaǵy Syrym, Tasqala, Aqsaı, Shaǵan jáne Jánibek ótkizý beketteri de kezeń- kezeńmen qaıta qurylmaqshy.
Aıta keteıik, BQO-da respýblıkalyq mańyzy bar joldardyń jalpy uzyndyǵy – 1414 shaqyrym. Bıyl sonyń 248 shaqyrymy kúrdeli, 76 shaqyrymy ortasha jáne aǵymdaǵy jóndeýmen qamtyldy.
