«Nurly jol» - basty nazarda
Aqtóbe qalasynyń jáne aýdandardyń ákimderi, oblystyq atqarýshy organdardyń jetekshileri jáne merdiger qurylys mekemeleriniń basshylary memlekettik baǵdarlamany iske asyrý aıasynda júrgizilgen jumystar týraly esep berdi.
Bıyl «Nurly Jol» memlekettik baǵdarlamasy aıasynda bizdiń aımaqqa Ulttyq qordan 16,2 mıllıard teńge bólindi. Bul qarjy 26 ınvestıtsııalyq jobany júzege asyrýǵa múmkindik beredi. Onyń ishinde quny 13,9 mıllıard teńge turatyn 8200 orynǵa arnalǵan 16 bilim berý mekemesiniń qurylysy, sondaı-aq, 2,3 mıllıard teńgege baǵalanǵan sýmen jabdyqtaý jáne sý tartý júıesiniń qurylysy men qaıta qalpyna keltirýge arnalǵan on nysan bar.
- Bıyl 16 jobanyń 10-y paıdalanýǵa beriletin bolady. Onyń ishinde Aqtóbe qalasyndaǵy 2440 orynǵa arnalǵan 6 mektep eńse tikteıdi. Sonymen qatar Qobda aýdanynyń ortalyǵy - Qobda aýylynda, Mártók aýdanyndaǵy Hlebodar, Rodnıkovka aýyldarynda jáne Muǵaljar aýdany Qandyaǵash qalasynda jańa mektepter boı kóteredi. Atalǵan bilim shańyraqtaryndaǵy oryn sany - 1560. Bul qurylystardy júrgizý úshin 1505 ýaqytsha jumys orny ashyldy, - deıdi oblystyq qurylys, arhıtektýra jáne qala qurylysy basqarmasynyń basshysy Serik Tólenbergenov.
Qalǵan 4200 orynǵa arnalǵan 6 mekteptiń qurylysyn - Aqtóbe jáne Alǵa qalalaryndaǵy, Hromtaý aýdanynyń Dóń aýylyndaǵy mektepterdi 2018 jyly aıaqtaý josparlanyp otyr.
Sondaı-aq, óńirde sýmen jabdyqtaý jáne sýmen qamtý maqsatyndaǵy jumystar da júrgizilip jatyr. Aǵymdaǵy jyly jalpy uzyndyǵy 110,2 shaqyrym bolatyn 6 nysan paıdalanýǵa beriledi. Onyń ishinde Shalqar aýdanynyń Bershigúr stantsııasynyń, Muǵaljar aýdanynyń Altyndy, Aşysaı, Muǵaljar aýyldarynyń jáne Qobda aýdanynyń Terisaqqan, Bestaý aýyldarynyń sýmen qamtý júıelerin qaıta qalpyna keltirý jáne qurylys jumystary bar.
2018 jyly Shalqar aýdanyndaǵy Begimbet aýylynyń káriz júıesin qalpyna keltirý jumystary, Temir aýdanyndaǵy Shubarqudyq eldi mekeniniń sý qubyry, Qarǵaly aýdanynyń Aqkól aýylynyń sýmen qamtý júıesi jáne Áıteke bı aýdanyndaǵy Tymabulaq aýylynyń sýqubyrlary júıesiniń qurylysy aıaqtalady.
Bul jobalardy júzege asyrýdyń arqasynda sýmen qamtý, sý tartý júıeleriniń tozýy tómendep, sýmen qamtý jelilerinde shyǵyn men apat azaıady. Sonymen birge ortalyqtandyrylǵan sý qubyrymen turǵyndardyń 92,6 paıyzy qamtylady dep josparlanyp otyr.
Oblys basshysy Aqtóbe qalasynyń jáne aýdandardyń ákimderine qurylys qarqynyn tómendetpeýdi tapsyrdy. Sondaı-aq, merdiger mekemelerdiń basshylaryna nysandardy bekitilgen merzimde tapsyrý kerektigin eske saldy.
- «Nurly Jol» - memlekettik baǵdarlamalardyń ishindegi bastylarynyń biri. Bul baǵdarlamanyń oryndalýy Memleket basshysynyń jeke baqylaýynda tur. Barlyq nysandar belgilengen ýaqytta aıaqtalýy kerek. Bul rette qurylystyń sapasy da basty nazarda bolýy tıis. Sapasy syn kótermeıtin qurylys júrgizgen jáne bekitilgen merzimde qurylys jumystaryn aıaqtamaǵan merdiger mekemelerge tıisti sharalar qoldanylatyn bolady, - dep túıindedi oblys ákimi B.Saparbaev.
Jıyn qorytyndysy boıynsha, salalyq basshylarǵa naqty tapsyrmalar berilip, baǵdarlamanyń oryndalý barysy qatań qadaǵalanatyny erekshe ataldy.
