«Nurly jol» baǵdarlamasy aıasyndaǵy páterdiń sharshy metri ózgerýi múmkin
ASTANA. QazAqparat - Úkimet otyrysynda 2017 jyldyń sońyna deıin «Nurly jol» baǵdarlamasy aıasynda salynatyn baspananyń aýmaǵyn 80 sharshy metr deńgeıinde saqtaý usynyldy. Bul týraly búgin turǵyn úı qurylysynyń barysy boıynsha baıandama jasaǵan «Báıterek» UBH» AQ Basqarma tóraǵasy Erbolat Dosaev málim etti.
«Qurylysy 2017 jyly bastalatyn jobalar boıynsha memlekettik baǵdarlamanyń barlyq qatysýshylary aýdany 80 sharshy metrge deıingi jobalardy ázirledi. Alaıda, «Nurly jol» memlekettik baǵdarlamasy sheńberinde 2017 jyldan bastap páterlerdiń sharshy kólemin 65 sharshy metrge deıin shekteý engizildi. Osylaısha, qurylys salýshylar buryn ázirlengen jobalardy qaıta qoldana almaıdy. Bul qurylys kompanııalardyń qosymsha shyǵyndaryna jáne jobalaý-smetalyq qujattamany kelisýdi 6 aıǵa deıin uzartýǵa ákeledi. Qurylys salýshylarmen josparly jumys júrgizý maqsatynda 2016 jyldyń deńgeıi - 80 sharshy metrge deıingi normatıvtiń kúshin 2017 jylǵa uzartý usynylady. Bul shara 2017 jyly kelisimshart jasaý úderisin jyldamdatýǵa múmkindik beredi», - dep túsindirdi E. Dosaev.
Budan bólek ol kóptegen óńirlerde ınjenerlik-kommýnıkatsııalyq ınfraqurylymy júrgizilgen jappaı qurylys salý oryndary joq ekenin atap ótti.
«Ákimdikter budan keıingi jyldary kóppáterli turǵyn úıdiń tutas bir shaǵyn aýdandaryn qalyptastyrý úshin egjeı-tegjeıli josparlaý josparlaryn jete taldaý qajet. Kredıttik turǵyn úı boıynsha qarajattyń 20 jyl boıy qaıta paıdalaný tetigi kózdelgendikten, Turǵyn úı qurylys jınaq banki úılerdiń tapsyrylýy josparlanatyn óńirlerde salymshylardy tartýdy kúsheıtetin bolady», - dep túıindedi sózin Erbolat Dosaev.
