«Nurly jol» baǵdarlamasy aıasynda turǵyn úı salýǵa jáne satyp alýǵa 250 mlrd. teńge jumsalady - Úkimettegi keńes

ASTANA. QazAqparat - Búgin Úkimet úıinde QR Premer-Mınıstriniń birinshi orynbasary Baqytjan Saǵyntaev arendalyq turǵyn úı qurylysy máseleleri boıynsha selektorlyq rejımde keńes ótkizdi, dep habarlady www.primeminister.kz saıty.

Keńes barysynda ortalyq atqarýshy organdardyń, «Báıterek» UBH» AQ-nyń, oblystardyń, Astana men Almaty qalalary ákimdikteriniń basshylary osy baǵytta júrgizilip jatqan jumys jaıly baıandady.

Esterińizge salsaq, Memleket basshysy «Nurly jol - Bolashaqqa bastar jol» atty Qazaqstan halqyna Joldaýynda Úkimetke áleýmettik arendalyq turǵyn úı salyp, satyp alý quqyǵymen barynsha tómen paıyzdarmen halyqqa usynýdy tapsyrǵan bolatyn.

«Nurly jol» baǵdarlamasy aıasynda turǵyn úı salýǵa jáne satyp alýǵa 250 mlrd. teńge jumsalady, úı salýshylardan jalpy aýdany 1 483 myń sharshy metr bolatyn 29 myń páter satyp alý josparlanǵan. Bıylǵy jyldyń naýryz aıynda Astana, Almaty, Kókshetaý, Semeı, Qostanaı qalalarynda aýdany 76,5 myń sharshy metr bolatyn alǵashqy 1 357 páter tapsyrylady. Barlyǵy bıylǵy jyly 78,7 mlrd. teńge somaǵa jalpy aýdany 505,3 myń sharshy metr bolatyn 8 616 páter salynyp, satyp alynady.

Talqylaý qorytyndysy boıynsha, Baqytjan Saǵyntaev «Báıterek» UBH» AQ-na oblystardyń, Astana men Almaty qalalarynyń ákimdikterimen birge qurylysty ýaqytyly aıaqtaýdy jáne turǵyn úıdi kezekte turǵandarǵa úlestirýdi qamtamasyz etýdi tapsyrdy.