«Nurly jol» baǵdarlamasy aıasynda bıyl Jańaqorǵanda 6 mektep salynady
Jalpy Qazaqstan boıynsha baǵdarlamaǵa oraı 56 mektep boı kóteredi dep kútilse, sonyń altaýy osy osy aýdanda salynbaq.
Oblystyq bilim basqarmasy mamandarynyń dereginshe, bul Jańaqorǵan kentindegi №56, Qojamberdi aýyldyq okrýgindegi №162, Aqqorǵandaǵy №256, Aqqum stansasyndaǵy №221, M.Nálibaev aýylyndaǵy №196 jáne Tómenaryq eldi mekenindegi №223 mektepter.
Qojamberdi, Aqqorǵan, M.Nálibaev jáne Aqqum aýyldaryndaǵy bilim oshaqtary 2000 jyldardyń basynda asar ádisimen salynǵan-dy. Al Jańaqorǵan kenti men Tómenaryqtaǵy mekteptiń irgetasy keńestik kezeńde qalanǵan.
Bilim oshaqtary arasynda Tómenaryqtaǵy mekteptiń tarıhy tym áride jatyr. Alǵash sonaý 1939 jyly 24-temirjol razezi balalary úshin ashylǵan mektep 1970 jyldary Tómenaryq aýylyna kóship kelipti. Segiz jyldan keıin onjyldyq orta mektep mártebesin ıelengen bilim oshaǵynda búginde jylyna 400 oqýshy bilim alady.
Ótken jyly qarashada jumysyn bastaǵan «SMP-Qyzylorda» JShS qazir mektep qurylysyn tolyq aıaqtady. Endi nysanǵa jańa jabdyqtar men kompıýterler jetkiziledi.
