«Nurly jol» baǵdarlamasy aıasynda bes jylda 7 myń shaqyrymnan astam jol qaıta jańartylady

ASTANA. QazAqparat - Infraqurylymdy damytýdyń «Nurly jol» memelkettik baǵdarlamasy boıynsha 2015-2019 jyldar aralyǵynda elimizde 11 avtokólik jolynyń jobasy júzege asyrylmaq. Osyǵan oraı, 7 myń shaqyrymnan astam jol qaıta jańǵyrtylady. Búgin Ortalyq kommýnıkatsııalar qyzmetinde ótken brıfıngte Investıtsııalar jáne damý mınıstrligi Avtokólik joldary komıteti tóraǵasynyń orynbasary Amangeldi Bekov málim etti.

«Memleket basshysynyń «Nurly jol» Joldaýyndaǵy tapsyrmalarǵa sáıkes, Qazaqstannyń ınfraqurylymyn damytý jónindegi 2015-2019 jyldarǵa arnalǵan baǵdarlamasy bekitilgeni belgili. Atalǵan baǵdarlama aıasynda 11 avtokólik joldary jobasyn júzege asyrý kózdelip otyr», - A.Bekov.

Atap aıtqanda, «Nurly jol» baǵdarlamasy aıasynda «Batys Eýropa-Batys Qytaı» jobasyn aıaqtaý, «Ortalyq-Ońtústik», Ortalyq-Shyǵys», «Ortalyq-Batys», «Almaty-Óskemen», «Qyzylorda-Jezqazǵan-Qaraǵandy», «Astana-Petropavl», «Oral-Kamenka», sondaı-aq «Astana qalasynyń ońtústik aınalma joly», «Jetibaı-Jańaózen» jáne «Úsharal-Dostyq» jobalary qolǵa alynady. Atalǵan jobalardyń jalpy quny 2,4 trln teńgeni quraıdy.

«Osynyń arqasynda jalpy alǵanda 7 myńnan astam shaqyrymdy qaıta jańartý josparlanýda. Osy maqsattarǵa Ulttyq qordan 2015-2016 jyldarǵa 301 mıllıard teńge bólinetin bolady», - dedi ol.