«Nurly jol» baǵdarlamasy aıasynda 7,3 myń páter paıdalanýǵa berilgen
Memlekettik baǵdarlama boıynsha jarty jylda atqarylǵan jumystar jaıynda ınvestıtsııalar jáne damý mınıstri Jeńis Qasymbek baıandady. Baǵdarlama halyqtyń áleýmettik jaǵynan osal toptary úshin jalǵa beriletin turǵyn úı salý, jeke turǵyn úı qurylysyn damytý, turǵyn úı qurylys jınaqtary júıesi arqyly ótkiziletin nesıelik turǵyn úı salý, jeke qurylys salýshylardy turǵyn úı salýǵa yntalandyrý, ıpotekalyq kredıt berýdiń qoljetimdiligin arttyrý sııaqty bes baǵytty qamtıdy.
Investıtsııalar jáne damý mınıstrliginiń málimetinshe, birinshi jartyjyldyqta barlyq kózder esebinen 5,5 mln. sharshy metr nemese 47,7 myń páter men úı paıdalanýǵa berildi, bul 2016 jyldyń osy kezeńinen 11% joǵary. Memlekettik qarajat esebinen «Nurly jer» baǵdarlamasy aıasynda 7,3 myń páter paıdalanýǵa berildi. «Turǵyn úılerdi paıdalanýǵa berý jaǵynan Astana men Almaty qalalary oq boıy ozyq keledi. Astana 1,5 mln. sharshy metr baspana paıdalanýǵa berse, Almaty 928 myń sharshy metr turǵyn úı saldy. Budan bólek, Mańǵystaý men Ońtústik Qazaqstan oblystaryn atap ótken jón», dedi J.Qasymbek.
Mınıstrdiń sózine qaraǵanda, basqa aımaqtarda da turǵyn úı qurylysynyń jandanýy baıqalady. Alaıda, Almaty men Pavlodar oblystarynda baspanany paıdalanýǵa berý jumysy kende qalyp otyr. «Qazirgi kezde salynyp jatqan qurylys nysandaryn ýaqytynda tapsyrý úshin aımaqtarǵa 33 mlrd. 800 mln. teńge aýdaryldy. Sonyń 29 mlrd. 300 mln. teńgesi ıgerildi. Jalpy, respýblıka boıynsha 3 633 shaqyrym ınjenerlik jelilerde tartý josparlanyp otyr. Ákimdikterdiń qazirgi málimetine sáıkes, osy ýaqytqa deıin 1 436 shaqyrym jeli tartyldy», dedi mınıstr. Turǵyn úı salý úshin jaryq, sý jáne taǵy basqa ınjenerlik jeliler bolýy shart. Búginde sol jelilerdi salý jaǵynan Qaraǵandy, Ońtústik Qazaqstan, Aqmola men Batys Qazaqstan oblystarynda jumys baıaý júrýde.
Baǵdarlamanyń tórt baǵytyn iske asyrý týraly «Báıterek» holdınginiń basqarma tóraǵasy E.Dosaev baıandady. Óńirlerdegi jaǵdaı týraly Soltústik Qazaqstan jáne Pavlodar oblystarynyń ákimderi Q.Aqsaqalov pen B.Baqaýov baıandama jasady.
Máseleni qaraýdy qorytyndylaı kele, Úkimet basshysy Baqytjan Saǵyntaev Investıtsııalar jáne damý mınıstrligi men «Báıterek» holdıngine halyqtyń qajettilikteri men azamattardyń ony satyp alýǵa daıyndyǵyn eskere otyryp, bólinetin qarajatty jáne turǵyn úı qurylysy kólemin josparlaýdy baqylaýǵa alýdy tapsyrdy. Memleket basshysynyń tapsyrmasy boıynsha, «Nurly jer» baǵdarlamasyn iske asyrý aıasynda bólinetin qarajatty maqsatty jumsaýdy qamtamasyz etý jáne jeke qurylys salýshylardy tartý boıynsha jumysty kúsheıtý qajet.
Premer-mınıstr Baqytjan Saǵyntaev ákimderge bıýdjet aqshasyna qaraı bermeı, jeke menshik qurylys salasyn damytý máselesin de nazardan tys qaldyrmaýdy eskertti. Úkimet basshysy jýyrda Elbasy buǵan deıin bólingen 210 mlrd. teńgeni qaıta taratý sharasyn maquldaǵanyn aıtty. Bul aqsha ákimdikterge kredıttik baspanany salý úshin aýdarylatyn bolady. «Bul qarajatty durys aınaldyryp, «revolverlik» ádispen qurylysqa qaıta salyp otyrǵan jón. Biraq jeke menshik qurylys salasyn da umytpaý qajet», dedi B.Saǵyntaev.
Oblys ákimdikterine «Nurly jer» baǵdarlamasynyń barlyq baǵyttary boıynsha jumysty jandandyrý, jappaı qurylys salatyn jerlerdi aldyn ala anyqtaý jáne taıaý jyldarǵa turǵyn úıdi paıdalanýǵa berý josparlarynda qarastyrylǵan kólemde jobalyq-smetalyq qujattama jasaýǵa jergilikti bıýdjetten ýaqytyly qarajat bólýdi qamtamasyz etý tapsyryldy.
