«Nurly jol» baǵdarlamasy aıasynda 17 ınfraqurylymdyq joba qamtylady

ASTANA. QazAqparat - «Nurly jol» baǵdarlamasy aıasynda 17 ınfraqurylymdyq joba qamtylady. Búgin Májilistiń Ekonomıkalyq reforma jáne óńirlik damý komıtetiniń keńeıtilgen otyrysynda QR Investıtsııalar jáne damý mınıstriniń birinshi orynbasary Jeńis Qasymbek osylaı málim etti.

Eske sala keteıik, otyrys barysynda «Nurly jol - bolashaqqa bastar jol» jańa ekonomıkalyq saıasatynyń sheńberindegi kólik ınfraqurylymyn damytý máseleleri talqylanǵan bolatyn.

«Qazirgi tańda Elbasy Joldaýy aıasynda «Nurly jol» baǵdarlamasyn júzege asyrý baǵyttary daıyndalyp jatyr. Ol boıynsha Qazaqstannyń aýmaqtyq damýynyń habtyq júıesi engiziletin bolady. Al «Nurly jol» baǵdarlamasy 17 ınfraqurylymdyq jobany qamtyp, onyń 12-si avtojol salasyn, beseýi temir jol ınfraqurylymy men teńiz porttary jáne Astana áýejaıy baǵytynda iske asyrylady», - dedi Jeńis Qasymbek.

Onyń sózine qaraǵanda, sońǵy on jylda elimizdiń avtokólik joldaryn damytýǵa úlken kóńil bólinip keledi. Máselen, Qazaqstanda jalpy qoldanystaǵy avtomobıl joldarynyń uzyndyǵy 96 myń shaqyrymnan assa, 2001 jyldan beri avtomobıl joldaryn qalpyna keltirýge 1,8 trln. teńge ınvestıtsııalaǵan. Bul rette qarajattyń 73 paıyzy respýblıkalyq mańyzdaǵy joldarǵa, al 27 paıyzy oblystyq jáne aýdandyq mańyzdaǵy joldarǵa jumsalǵan.

Budan bólek, mınıstr orynbasary 2007 jyldan bastap jergilikti jelini qarjylandyrý kórsetkishi de aıtarlyqtaı óskenin, al joldardy damytý barysynda alty halyqaralyq dálizdi qalpyna keltirýge basymdyq berilgenin atap ótti.