«Nurly Jol»: Atyraý oblysynda buryn-sońdy bolmaǵan kólemde turǵyn úı salynýda
ASTANA. QazAqparat - 2018 jyly óńirde 44 kópqabatty turǵyn úıdiń qurylysy júrgizilýde, bul Qazaqstannyń táýelsizdik jyldaryndaǵy turǵyn úı qurylysynyń eń joǵary kórsetkishi bolyp tabylady, dep habarlaıdy QazAqparat.
Turǵyn úıler «Nurly Jol» baǵdarlamasy aıasynda salynýda, bul úılerdegi páterler «Nurly Jol» jáne «7-20-25» kredıttik baǵdarlamalary boıynsha beriletin bolady.
2018 jyly óńirde barlyǵy 3892 páterlik 44 kópqabatty turǵyn úıdiń qurylysy bastaldy. 34 úı osy jyly paıdalanýǵa beriledi. Oblys ortalyǵynda 39 úıdiń qurylysy júrgizilýde, qalǵan úıler aýdandarda salynyp jatyr.
«Kredıttik turǵyn úılermen qatar, bul jerde kezekte turǵandardyń 13 sanaty úshin áleýmettik turǵyn úıler de salynady, - dedi Atyraý qalasy ákiminiń orynbasary Nurlan Taýbaev. - Bul turǵyn úı qurylysynyń buryn-sońdy bolmaǵan kórsetkishi, táýelsizdik jyldaryndaǵy óńirdegi eń joǵary turǵyn úı kólemi ekenin atap ótý kerek. Biz mundaı kóp kólemde páterdi paıdalanýǵa berý jyljymaıtyn múlik naryǵyndaǵy baǵanyń tómendeýine oń áserin tıgizedi dep boljamdap otyrmyz».
Nurlan Taýbaev aıtyp ótkendeı, mundaı kóp turǵyn úıdiń qurylysy jeke qurylys salýshylar tarapynan qyzyǵýshylyqtyń joǵary bolýynyń nátıjesinde múmkin boldy.
«Kásipkerlerdi birinshi kezekte óńirdiń qolaıly ınvestıtsııalyq ahýaly, bıznes júrgizý úshin jaıly jaǵdaılar qyzyqtyrady, - dedi óz sózinde N.Taýbaev. - Óńir basshysynyń tapsyrmasy boıynsha biz memlekettik qoldaýdyń barlyq múmkindikterin jasaı otyryp, árbir qurylys salýshymen jeke jumys jasaımyz. Bul óz kezeginde iske qosylatyn turǵyn úıler sanynyń ulǵaıýy túrinde óz jemisin beredi».
