«Nurly jol»: Aqtóbede eki mektep paıdalanýǵa berildi
Aqtóbe qalasynyń Aqshat aýylynda 300 oryndyq mektep paıdalanýǵa berildi. Jańa mektepti salýǵa «Nurly jol» baǵdarlamasy aıasynda 800 mıllıon teńgeden astam qarjy bólinip, jumsaldy. Álıhan Bókeıhanov atyndaǵy №67 orta mektep zamanaýı qural-jabdyqpen qamtamasyz etilgen, arnaıy oqý kabınetteri bar.
«Memleket basshysy óskeleń urpaqtyń tárbıesi men bilim alýyna erekshe nazar aýdaryp keledi. Bul baǵytta bizdiń óńirde kóptegen josparly jumystar júrgizilip jatyr. Táýelsizdik jyldarynda oblysymyzda 125 mektep salyndy, al mektepke deıingi uıymdar 457-ge jetti. Qazir balabaqshamen qamtamasyz etý 96% quraıdy», - dedi Aqtóbe oblysynyń ákimi Berdibek Saparbaev.
Bıyl Aqtóbe oblysy boıynsha 31 mekteptiń qurylysy júrgizildi. Qazirgi ýaqytta onyń 15-i paıdalanýǵa berildi. Ári balalar men jasóspirimderge arnalǵan Shyǵarmashylyq akademııasy, Jekpe-jek saraıy paıdalanýǵa berildi.
«Bir jylda turǵyzylǵan jańa mektepte zaman talabyna saı barlyq jaǵdaı jasalǵan. Mekteptiń muǵalimder quramy bolashaqta el damýyna eleýli úles qosatyn joǵary bilimdi jastardy tárbıeleýge barlyq kúsh-jigerin jumsaýǵa tıis», - dep B.Saparbaev.
Mektepte zerthanalar, mýltımedıalyq kabınetter jáne ınteraktıvti taqtalar bar. Inklıýzıvtik bilim berýdi damytý sheńberinde tirek qımyly buzylǵan balalarǵa arnap arnaıy apparat jetkizildi. Múmkindikteri shekteýli balalarǵa arnalǵan jedelsaty, pandýs, jıhazben qamtamasyz etildi.
Aıta keteıik, «Bolashaq» yqsham aýdanynda №68 orta mektep ashyldy. Bul aýdanda múlde bilim ordasy bolǵan joq. Aqtóbe oblysy ákiminiń baspasóz qyzmetiniń habarlaýynsha, qurylys jumystaryna 755 mıllıon teńge jumsaldy. 
