Nurly jol: Aqmola oblysynda 687,6 shaqyrym jol jóndeledi

KÓKShETAÝ. QazAqparat - Aqmola oblysynda «Nurly jol» baǵdarlamasy sheńberinde 687,6 shaqyrym jol jóndeledi. Bul týraly óńirlik kommýnıkatsııalar qyzmetinde onlaın formatta ótken brıfıngide oblys ákiminiń orynbasary Asqar Muratuly aıtty, dep habarlaıdy QazAqparat tilshisi.

Ákim orynbasarynyń aıtýynsha, «Nurly jol» baǵdarlamasy qolǵa alynǵannan beri 2015-2019 jyldar aralyǵynda óńirde oblystyq jáne aýdandyq mańyzy bar 1500 shaqyrymnan astam jol jóndelgen. Naqtyraq alsaq, Jańa Kolýton-Aqkól-Azat-Mınskıı, Orta Aqsý-Bestóbe-Izobılnyı joldaryna kúrdeli jóndeý jumystary júrgizildi. Bıyl oblys aýmaǵyndaǵy jergilikti mańyzy bar avtokólik jolyn jóndeýge 40,5 mıllıard teńge qarjy bólingen. Bul qarjynyń 14,2 mıllıard teńgesi respýblıkalyq qazynadan, 10 mıllıard teńgesi oblystyq bıýdjetten 3,4 mıllıard teńgesi Úkimet qorynan jáne 12,9 mıllıard teńgesi «Jumyspen qamtýdyń jol kartasy – 2020» baǵdarlamasy arqyly bólinip otyr.

«Bıyl «Nurly jol» baǵdarlamasy sheńberinde respýblıkalyq jáne oblystyq mańyzdaǵy joldardan bólek, aýyl arasyndaǵy joldar jóndeýden ótkizilýde», – deıdi Asqar Muratuly.

Bólingen qarjyǵa barlyǵy 687,6 shaqyrym jergilikti mańyzy bar joldar men aýylishilik kóshelerdi jóndeý josparlanǵan. Qazirgi kezde Elenovka-Chıstopole-Esil, Balkashın-Shańtóbe, Atbasar-Qıma, Qonysbaı-Seıfýllın-Qyzylsaıa aýyldary aralyǵyndaǵy joldar jóndelip jatyr. Buǵan 7,8 mıllıard teńge qarastyrylǵan.

Sonymen qatar, ákim orynbasary elorada mańyńdaǵy eldi mekenderdi áleýmettik-ekonomıkalyq damytýdyń keshendik jospary, «Aýyl - el besigi» jobasynyń jaı-japsaryna toqtalyp ótti.