«Nurly jer»: Soltústik Qazaqstan men Pavlodarda qurylys mardymsyz júrip jatyr
«Nurly jer» baǵdarlamasynyń 7 aıdaǵy qorytyndysy shyqty. Elimiz boıynsha bıyl 1,2 mıllıon sharshy metr turǵyn úı paıdalanýǵa berilýi tıis. Qazirgi ýaqytta qurylystyń 61 paıyzy aıaqtalǵan. Aımaqtardyń biri kósh bastasa, ekinshisi birneshe ret memlekettik satyp alý rásimin ótkizip, taıaýda ǵana qurylysqa kirisken. Elimizdegi barlyq aımaqtyń ókilderimen kezdesken Premer-Mınıstrdiń birinshi orynbasary Asqar Mamın Soltústik Qazaqstan, Pavlodar, Qaraǵandy oblystary men Astana qalasynyń qurylysqa jaýapty ákim orynbasarlarynan tapsyrmany oryndaýdy talap ketti.
«Elimizde turǵyn úı qurylysy qarqyndy damyp jatyr. Respýblıka boıynsha 2017 jyldyń 7 aılyq qorytyndysynda 6,2 mıllıon sharshy metr turǵyn úı paıdalanýǵa berildi. Bul kórsetkish ótken jyldyń sáıkes kezeńimen salystyrǵanda 8,2 paıyzǵa artyp otyr. Bıyl 10 mıllıon sharshy metrden astam turǵyn úı paıdalanýǵa beriledi dep josparlanýda. Úkimet pen jergilikti memlekettik organdarǵa úlken jaýapkershilik júkteldi»,- dedi Asqar Mamın.
Elimiz boıynsha turǵyn úı qurylys jumystaryna bıyl 445 mıllıard teńge ınvestıtsııa salyndy. Barlyǵy 53 949 úı paıdalaýǵa berilgen. Qazirgi kezde «Nurly jer» baǵdarlamasy 61 paıyzǵa oryndalǵan. Qurylys jumystaryn júrgizýde Astana, Almaty, Mańǵystaý, Ońtústik Qazaqstan oblystary alda keledi. Al Pavlodar, Soltústik Qazaqstandaǵy qurylys jumystary mardymsyz.
«Aımaqtarda arendalyq turǵyn úıler salynyp jatyr. Satyp alý quqyǵy berilmeıtin páterler áleýmettik jaǵdaıy tómen otbasylarǵa arnalǵan. Jylpy aýmaǵy 311 myń sharshy metr, ıaǵnı, 6 myń páter. Bıyl 150 myń sharshy metr páter paıdalanýǵa berilýi tıis edi. Alaıda Mańǵystaý, Almaty, Shyǵys Qazaqstan oblystary memlekettik satyp alý baıqaýyn kesh ótkizip, jospardy oryndaýǵa kedergi bolyp otyr. Keıbir aımaq memlekettik baıqaýdy ekinshi ret ótkizip, ýaqyt joǵaltyp aldy. Bul qurylysqa respýblıkalyq bıýdjetten 25 mıllıard teńge qarjy bólingen bolatyn. Aımaqtarǵa 10,4 mıllıard teńge berildi. Onyń 91 paıyzy ıgerildi. Astana, Mańǵystaý, Qostanaı, Jambyl, Pavlodar oblystary qarjyny durys ıgere almaı keledi»,- dedi QR Investıtsııalar jáne damý vıtse-mınıstri Roman Sklıar.
Astana qalasy ákiminiń orynbasary Sergeı Horoshýn birde-bir arendalyq turǵyn úı qurylysyn bastamaǵany úshin Asqar Mamınniń synyna ushyrady. Ol elordada básekelestik joǵary ekenin, árbir memlekettik baıqaýdan soń kásipkerler sotqa shaǵym túsiretinin, qarjylyq tekserýler jıi bolatynyn aıtyp aqtaldy. Biraq bul sebepter basshylardyń jaýapkershiligin jeńildete almaıdy.
«Nurly jer» baǵdarlamasy boıynsha ár aımaqqa qarjy teń bólinedi. Tapsyrma bir bolǵanymen, onyń oryndalýy árqıly. Máselen, Almaty men Atyraý oblystary jańa jobany qarjylandyrýǵa suranys bermegen. Mańǵystaý men Shyǵys Qazaqstan oblystary bólinetin qarjyǵa qajetti qujattardy tapsyrmaǵan.
«Injenerlik-kommýnıkatsııalyq jelilerdiń qurylysyna bıyl respýblıkalyq bıýdjetten 83,4 mıllıard teńge bólindi. Aımaqtarǵa 44 mıllıon teńge qarastyrylǵan. Qarjynyń ıgerilýi - 88 paıyz. Astana, Qyzylorda, Pavlodar, Jambyl oblystarynda qarjyny ıgerý kórsetkishi tómen. Aımaqtar 2018-2020 jyldarǵa arnalǵan jobalaryn keshiktirmeı tapsyrýy kerek. Atyraý men Mańǵystaý múlde joba usynbady. Bul aldaǵy ýaqytta qurylys jumystaryna kedergi keltirip, qurylystyń toqtaýyna ákep soǵýy múmkin»,- dedi vıtse-mınıstr Roman Sklıar.
«Nurly jer» baǵdarlamasynyń keıbir aımaqta durys júrgizilmegenin synaǵan Úkimet basshysynyń birinshi orynbasary Asqar Mamın aldaǵy ýaqytta Elbasy aldynda jeke-jeke esep beretinderin eske saldy.
