«Nurly jer»: Senatorlar Aqtóbe oblysyndaǵy jumystardy tekserdi

AQTÓBE. QazAqparat – Senattyń Ekonomıkalyq saıasat, ınnovatsııalyq damý jáne kásipkerlik komıtetiniń depýtattary Aqtóbe oblysynda kóshpeli otyrys ótkizdi, dep habarlaıdy QazAqparat.

Senattyń baspasóz qyzmetinen málim etkendeı, depýtattar óńir basshylyǵymen, kásipkerlermen jáne sarapshylarmen birlese otyryp 2020-2025 jyldarǵa arnalǵan «Nurly jer» memlekettik baǵdarlamasyn iske asyrý jáne ındýstrııalyq aımaqtardy damytý máselelerin talqylady.

Palata depýtaty Saǵyndyq Luqpanov ótken jyly «Arnaıy ekonomıkalyq jáne ındýstrııalyq aımaqtar týraly» zań qabyldanǵanyn eske sala kelip, ındýstrııalyq aımaqtardy zańnamalyq jetildirý máselesindegi problemalar senatorlardyń baqylaýynda ekenin atap ótti.

«Bizdiń kóshpeli otyrysymyzdyń negizgi maqsatynyń biri - naqty óndiristi memlekettik yntalandyrýdaǵy keleshegi zor quraldardyń biri retinde ındýstrııalyq aımaqtardyń qyzmetimen tanysý bolyp otyr. Osyǵan baılanysty biz olardyń damý qarqynyn tejeıtin problemalyq máselelerdi anyqtaýymyz kerek», - dedi senator.

Depýtattar sondaı-aq nysandardy aralap, «Nurly jer» memlekettik baǵdarlamasyn iske asyrý barysymen tanysty. Olar sondaı-aq birqatar kásiporyndarda, onyń ishinde jylyjaılarda, rels qurastyratyn jáne ferroqorytpa zaýyttarynda boldy.