Nurly jer: Saryaǵashta 600-ge jýyq otbasy baspanaly bolmaq

ASTANA. QazAqparat - Bıyl Ońtústik Qazaqstan oblysy Saryaǵash aýdanynda «Nurly jer» memlekettik baǵdarlamasy aıasynda kópqabatty 13 turǵyn úı paıdalanýǵa beriledi. Nátıjesinde úı kezeginde turǵan 585 otbasy baspanaly bolmaq, dep habarlaıdy QazAqparat ákimniń baspasóz qyzmetine silteme jasap.

Osy jumystarǵa dep qazynadan 5 mlrd 278 mln teńge qarjy bólingen.

Jańa páterler negizinen áleýmettik kómekke zárý azamattarǵa úlestiriledi. Olardyń qataryna múmkindigi shekteýli jandar, kópbalaly otbasylar, soǵys ardagerleri men olarǵa teńestirilgen azamattar jáne jańadan otaý qurǵan jastar kiredi.

Kópqabatty turǵyn úılerdiń qurylysymen «Yntymaq Bes-arys» JShS, «Olja» JShS, «Arkýa grýpp» JShS, «Dáýlet» JShS, TSK-Rabat JShS, Balta-sapar JShS aınalysady.

Aıta keteıik, demografııalyq ósý qarqyny joǵary aýdanda sońǵy 40 jylda mundaı kólemde baspana salynbaǵan.

Sondaı-aq, Túlkibas aýdanynda da jalpy somasy 2415,9 mln teńgege kópqabatty 5 turǵyn úıdiń qurylysy bastaldy. Onyń  1863,5 mln teńgesi oblystyq, qalǵany respýblıkalyq qazynadan bólingen. Jospar boıynsha nysandardyń qurylys jumystary 2019 jyly aıaqtalady. Nátıjesinde 256 otbasy baspanaly bolady dep kútilýde. Qazirgi tańda aýdandaǵy turǵyn úı kezegine 1482 azamat tur.