Nurly jer: Sarqan aýdanynda 50 páterli turǵyn úı salynyp jatyr

TALDYQORǴAN. QazAqparat- Almaty oblysynyń Sarqan aýdanynda «Nurly jer» memlekettik baǵdarlamasy aıasynda jyl sońyna deıin kóp qabatty 50 páterli turǵyn úı paıdalanýǵa beriledi, dep habarlaıdy QazAqparat tilshisi.

Qurylys jumystary 2020 jyly bastalǵan turǵyn úıdiń irgetasy qalanyp, búgingi kúni jumys qarqyn alǵan. Onda 45 adam maýsymdyq jumysqa tartylyp, 10-ǵa jýyq tehnıka jumys isteýde. Atalǵan nysannyń aıaqtalý merzimi 2021 jyldyń sońyna deıin josparlanýda.

«Jalpy, aýdanda 2006 - 2019 jyldar aralyǵynda 55 turǵyn úı salynyp, baspana kezeginde turǵan azamattarǵa berilgen edi. Aldaǵy jyldarda kóp qabatty turyn úılerdi kóptep salýdy basty nazarǵa alyp otyrmyz. Osy arqyly turǵyn úı kezeginde turǵan azamattar ár túrli memlekettik baǵdarlamalarǵa qatysyp, jeńildetilgen nesıe arqyly úı-jaıǵa qol jetkizýge múmkindik týmaq. Bıylǵy jyly qala ortalyǵynan zamanaýı úlgide salynyp jatqan 5 qabatty turǵyn úı kompleksin qoldanysqa beremiz dep josparlap otyrmyz», - dedi Sarqan aýdan ákiminiń orynbasary Mynbaev Jomart.

Sonymen qatar, Sarqan qalasynda 2 qabatty 20 páterli turǵyn úıdiń qurylys jumystaryn júrgizý úshin memlekettik satyp alýǵa ashyq konkýrs jarııalandy. Qurylys jumystarynyń jalpy quny 296,53 mln teńgeni quraıdy.

Aıta keteıik, 5 qabatty 50 páterli turǵyn úı jumysyna jalpy somasy 505,630 mln teńge qarajat bólingen.