Nurly jer: Rýdnyıda jetim balalarǵa páter berildi

QOSTANAI. QazAqparat - Rýdnyı qalasynyń turǵyndaryna memlekettik baǵdarlamamen salynǵan 60 páterli eki kópqabatty úı tapsyryldy, dep habarlaıdy QazAqparat tilshisi.

Aıta ketý kerek, Rýdnyıda el táýelsizdigin alǵannan bastap tuńǵysh ret kópqabatty úıler turǵyndardyń ıeligine berilip otyr. Páter ıelerin quttyqtaý úshin oblys ákimi Arhımed Muhambetov keldi.

«Búgin sizder úshin óte qýanyshty kún. Jańa jyl qarsańynda 60 páterli eki kópqabatty úıdi tapsyryp otyrmyz. «Nurly jer» baǵdarlamasy arqyly salynǵan osy jaldamaly úılerdiń sapasy óte jaqsy. Zamanaýı qurylys materıaldary paıdalanylǵan», - dep atap ótti Arhımed Muhambetov quttyqtaý sózinde.

Jaldamaly úılerdiń 38 páteri jetim balalarǵa berildi. Qalǵandary kezekte turǵandardyń enshisine tıdi. Jalpy atalǵan turǵyn úılerdi salýǵa 868 mln teńge jumsaldy. Taǵy 170 mln teńge ınjenerlik kommýnıkatsııa júrgizýge qarastyrylǵan.