«Nurly jer»: Oralda 8 kóppáterli turǵyn úı iske qosylmaq

ORAL. QazAqparat – «Nurly jer» memlekettik baǵdarlamasy aıasynda Oral qalasynda jyl sońyna deıin 8 kóppáterli turǵyn úı iske qosylmaq. Bul týraly brıfıngte qala ákimi Abat Shynybekov málim etti, dep habarlaıdy QazAqparat tilshisi.

Onyń aıtýynsha, bul úılerdiń (1355 páter) jalpy aýdany – 76943 sharshy metr. Sonyń ishinde 941 páterlik 6 turǵyn úı Turǵyn úı qurylys jınaq bankiniń salymshylaryna beriledi. Al 414 páterlik 2 turǵyn úı jergilikti atqarý organdarynda kezekte turǵandarǵa arnalǵan.

Sonymen qatar bıyl 698 páterdi quraıtyn 6 turǵyn úıdiń qurylys jumystary bastaldy. Bul úılerdi kelesi jyly qoldanysqa berý kózdelýde.

Qalanyń soltústik-shyǵys bóliginde apatty úıler turǵyndary úshin 2 kópqabatty úı (244 páter) salynýda. Bular da 2021 jyly paıdalanýǵa berilmek.

«Bıyl «Nurly jer» memlekettik baǵdarlamasy boıynsha 20,270 mlrd teńge qarastyryldy. Sonyń ishinde 13,253 mlrd teńge turǵyn úı qurylysyna, 7,017 mlrd teńge ınjenerlik ınfraqurylymǵa bólindi. Jalpy alǵanda, qazirgi tańda memlekettik bıýdjet esebinen bir mezgilde 2297 páterlik 16 turǵyn úıdiń qurylysy júrgizilýde», dedi Abat Abaıuly.

Ákimniń sózine qaraǵanda, qala bıýdjeti jyl saıyn úzdiksiz ósip keledi. Bul – birinshi kezekte «Nurly jol», «Nurly jer» jáne basqa da memlekettik baǵdarlamalardyń nátıjeli júzege asyrylýynyń jemisi.

Budan basqa halyqty jumyspen qamtý maqsatynda 2020-2021 jyldarǵa arnalǵan jumyspen qamtýdyń jol kartasyna sáıkes qalaǵa 15 mlrd astam teńge bólindi. Bul qarajat joldar men áleýmettik nysandardy jóndeýge, ınjenerlik jeliler salýǵa jáne abattandyrýǵa jumsalýda.

Bıylǵy 1 qazandaǵy málimet boıynsha qala bıýdjeti 80,8 mlrd teńgege jetti, bul ótken jylǵydan (53,6 mlrd teńge) 51 paıyzǵa artyq.

Damý bıýdjeti 27,5 mlrd teńgeni qurasa, bul – búkil bıýdjettiń úshten biri, ótken jylǵydan (14,2 mlrd teńge) 2 esege jýyq kóp.

«Jyl saıyn Oraldaǵy jergilikti ózin-ózi basqarý organdarynyń bıýdjet kólemi de ulǵaıýda. Ótken jyly 591,5 mln bolsa, bıyl 753,4 mln teńgege deıin, ıaǵnı 28 paıyzǵa kóbeıdi. Bul qarajat jergilikti qoǵamdastyqtyń kelisimimen ǵana bólinedi. Turǵyndardyń ujymdyq usynys-tilekteri negizinde bıyldan bastap 22 myńnan astam turǵyny bar Derkól kentiniń ákimdigi de qurylyp, jumys jasaýda.

Sonymen qatar qalada «Halyq qatysatyn bıýdjet» jobasyn júzege asyrý josparlanyp otyr. Bul joba boıynsha árbir turǵyn qalany damytýǵa baılanysty óziniń úlgi jobasyn usyna alady jáne úzdik jobany azamattar daýys berý arqyly anyqtaıdy», dedi A.Shynybekov.