«Nurly jer»: Oralda 180 turǵyn baspanaly boldy
Qalada «Nurly jer» baǵdarlamasynyń aıasynda salynǵan toǵyz qabatty turǵyn úı paıdalanýǵa berildi. Páterlerdiń 1 sharshy metriniń baǵasy 133 000 teńgeden satyldy.
Jańa nysan «Kóktem» yqshamaýdanynda ornalasqan. Bul aýdanda damyǵan ınfraqurylym bar, jańa balalar aýrýhanasy, 1200 oryndyq mektep, dene tárbıesi-saýyqtyrý kesheni, eki balabaqsha salynǵan.
Batys Qazaqstan oblysynyń ákimi Altaı Kólginov pen «Qazaqstannyń Turǵyn úı qurylys jınaq banki» AQ («Báıterek» holdınginiń enshiles uıymy) Batys Qazaqstan oblystyq fılıalynyń dırektory Aıgúl Naýryzalıeva páterlerdi aralap, TÚQJB klıentterin baspanaly bolýlarymen quttyqtady.
«Osy jyly bizdiń aımaqta «Nurly jer» memlekettik baǵdarlamasynyń aıasynda Turǵyn úı qurylys jınaq bankiniń myńǵa jýyq salymshysy úı ala alady. Bul - qala turǵyndary, sondaı-aq aýdandar men aýyldarda turatyn jandar. 50 000-80 000 teńge jalaqy alatyn aımaq turǵyndaryna naryqtyq baǵamen úı alý qıyn. Sondyqtan olar úshin memlekettiń qoldaýymen qoljetimdi úıler salynyp jatyr. Bank óz kezeginde turǵyndarǵa alǵashqy jarnanyń basyn qurap, jeńildikti sharttarmen baspana satyp alýǵa kómektesýde», - dep túsindirdi Batys Qazaqstan oblysy fılıalynyń dırektory Aıgúl Naýryzalıeva.
Memlekettik baǵdarlamaǵa qatysý úshin salymshylarǵa eń tómengi alǵashqy jarna retinde shottaryna páter qunynyń 30%-na teń aqsha jınaý kerek boldy. Jetpeıtin somany bank jyldyq mólsherlemesi 5% bolatyn zaem túrinde berdi.
Batys Qazaqstan oblysy Aqjaıyq aýdanynyń turǵyny Anna Sadyqova stýdent kezinde úıge aqsha jınap bastaǵan eken. TÚQJB-daǵy depozıtti ol 2010 jyly ashyp, aı saıyn 10 000 teńgeden salyp turypty. Jumysqa turǵan soń aı saıynǵy tólem kólemi artqan. Nátıjesinde memleket syılyqaqysy, bank syıaqysy jáne baǵam aıyrmashylyǵy tólemaqysyn qosa alǵanda Anna qajet somany jınap, bir bólmeli páter satyp alǵan.
«Azdap aqsha salyp turyp ta men baspanaly bolatynyma sendim. Qazir páter alyp, nátıjeni kórgen soń, anama qosymsha depozıt ashyp berdim. Bolashaqta budan da keńirek páter alý úshin birlesip aqsha jınap jatyrmyz», - dep tájirıbesimen bólisti bank salymshysy Anna Sadyqova.
«Nurly jer» memlekettik baǵdarlamasyna bank klıentteri «baspana.kz» jyljymaıtyn múlik portaly arqyly qatysa alady. Nysan qurylysy aıaqtalmaı jatyp-aq bank portalda bir aıǵa sozylatyn daýys berý bastalǵany týraly habarlandyrý jarııalaıdy. TÚQJB klıenti salynyp jatqan nysannyń jaılylyq sanatyn, baǵasy men árleýin hosh kórse, portalda ótinish berý arqyly óz daýysyn beredi. Daýys berý aıaqtalǵan soń upaı esebi avtomatty túrde júrgizilip, páter satyp alýshylar pýly qalyptasady. Upaı sany shotqa aqshanyń qanshalyqty turaqty salynyp turǵanyna baılanysty túziledi.
