«Nurly jer»: Oral qalasynda jańa qazandyq ornatylýda
«Jaıyqjylýqýat» AQ bas dırektory Qýat Mýsınniń brıfıngte málim etkenindeı, Zachagan kentindegi «Vodstroı» avtokólik kásiporny» ǵımaratyndaǵy qazandyqty qaıta qurý jobasyn júzege asyrý úshin merdiger uıym «Jaıyqqurylys» JShS-men 546,303 mln teńgege kelisimshart jasalǵan.
Kúni búgin demontaj jumystary 90 paıyzǵa oryndaldy.
Jýyrda úsh qazandyq jetkizilgennen keıin montajdaý jumystary bastalady.
Qazandyqqa 33 turǵyn úı (2147 abonent), 7 áleýmettik-mádenı, turmystyq nysan (sonyń ishinde 3 balabaqsha) jáne 43 basqa nysan qosylady.
Jumysty 31 jeltoqsanda aıaqtaý kózdelýde.
Q.Mýsınniń aıtýynsha, «Jaıyqjylýqýat» AQ barlyǵy 1513 nysandy jylýmen qamtıdy. Sonyń ishinde 1196-sy – turǵyn úı, 42-si – balabaqsha, 49-y – bilim berý, 35-i – densaýlyq saqtaý nysany, 188-i – basqa nysandar.
Qazirgi tańda 1196 úıdiń 665-inde (56 paıyzyn) ázirlik jumystary júrgizilip, 241-i (20 paıyzy) daıyndyq qujatyn aldy. Sondaı-aq 509 mekemeniń 230-y (45 paıyzy) ázirlenip,183-ine (36 paıyzyna) daıyndyq qujaty berildi. Sonyń ishinde balabaqshalar 100, mektepter 88 paıyzǵa daıyn.
Bas dırektordyń sózine qaraǵanda, aldaǵy jylytý maýsymyna ázirlik barysynda 405,9 mln teńgeni ıgerý kózdelgen bolatyn. Sonyń ishinde jylý-qýat ortalyǵy boıynsha – 230,943 mln teńge, jylý jelileri boıynsha – 174,957 mln teńge (5,212 km).
Kúni búginge deıin bul jumystar 330,7 mln teńgege nemese 81 paıyzǵa oryndalyp otyr.
«Bir aıta ketetin jaıt, mekemeniń jylý qýaty úshin debıtorlyq alashaǵy 440,74 mln teńge bolsa, sonyń ishinde bıýdjettik mekemeler boıynsha – 0,85 mln teńge, ónerkásip jáne basqa kásiporyndar – 27,76 mln teńge, turǵyndardyń bereshegi – 412,13 mln teńge. Tólemderdiń ýaqtyly túsýin turaqty baqylaýmen qatar qaryzdy sot arqyly óndirý jumystary da júrgizilýde», dedi Qýat Mýsın.
