«Nurly jer»: Lısakov qalasynda turǵyn úı qurylysy 5 esege artqan

QOSTANAI. QazAqparat - Jyl sońyna deıin Qostanaı oblysynyń Lısakov qalasynda 60 páterli turǵyn úı qoldanysqa beriledi. Bul týraly óńirlik kommýnıkatsııalar qyzmetinde ótken brıfıngte Lısakov qalasynyń ákimi Almat Ismaǵulov málim etti, dep habarlaıdy QazAqparat.

Almat Ismaǵulov Elbasynyń bıylǵy Joldaýyn iske asyrý sheńberinde iske asyp jatqan jumystardy jan-jaqty habardar etti. Jyl basynan beri Lısakov qalasynyń negizgi ekonomıkalyq kórsetkishteri aıtarlyqtaı ósken. Ásirese turǵyndardy baspanamen qamtý salasy qarqyn alǵan.

«Osy ýaqytqa deıin 1001 sharshy metr aýmaqta turǵyn úı salyndy. «Nurly jer» memlekettik baǵdarlamasymen bastalǵan 60 páterli arendalyq turǵyn úı keler jyly paıdalanýǵa beriledi. Al bıyl «Qazaqstan alıýmınııi» AQ ken basqarmasynyń qyzmetkerlerine arnalǵan kólemi 3,6 myń sharshy metrli taǵy da 60 páterli turǵyn úı qurylysy aıaqtalady. Memlekettik-jekemenshik seristestik aıasynda «SpetsStalKonstrýktsııa» JShS-nyń ınvestor bolýymen jataqhana ǵımaraty 16 páterli arendalyq turǵyn úıge aınalady. Osyndaı naýqannyń nátıjesinde shaharda jyl sońyna deıin baspanamen qamtý byltyrǵyǵa qaraǵanda 5 esege artyp, 5840 sharshy metrdi quraǵaly otyr», - dedi qala ákimi.
 

Aıta keteıik, Ortalyq kommýnıkatsııalar qyzmetinde ótken brıfıngte Qostanaı oblysynyń ákimi Arhımed Muhambetov baspanamen qamtý jumystary týraly baıandama jasaǵan-dy. Jyl basynan beri oblysta 17 paıyzdyq ósimmen 227,6 myń sharshy metr turǵyn úı paıdalanýǵa berilgen. 

Almat Ismaǵulov basqa da salalardaǵy jetistikterge toqtaldy. Shaharda memlekettik baǵdarlamalardy iske asyrý, adamı kapıtaldy qalyptastyrýǵa baǵyttalǵan sharalar, uzaq merzimdi áleýmettik-ekonomıkalyq damý josparlaryn oryndaý, shaǵyn jáne orta bıznesti turaqty qoldaý jumystary josparly júrgizilip keledi.

«Qalamyzdyń damýy óndiristik kásiporyndarǵa tikeleı baılanysty. Búginde ónim kólemi 38 mlrd teńgege jetip otyr. Bul byltyrǵy jylmen salystyrǵanda 136%-ǵa artyq. Taý-ken salasynda 31 mlrd teńgeniń ónimi óndirilip, ótken jylǵydan 45%-ǵa kóbıedi. Al óndiristik kásiporyndardyń qaıta óńdeý sektory 4,9 mlrd teńgeniń ónimin shyǵardy», - dedi A.Ismaǵulov.

Lısakov qalasy energııa únemdeý jaǵyn júıeli qolǵa aldy. Qazirgi ýaqytta qaladaǵy 1850 jaryqshamnyń 60%-y únemdelgen tártipke kóshken. Qala ákiminiń baıandaýynsha, keler jyly osyndaı 900 jaryqsham ornatylyp, shahar kóshelerinde tolyǵymen únemdelgen jaryq beriletin bolady.