«Nurly jer»: Qyzylorda oblysynda bıyl 6400 otbasy baspanaly bolady
QR Indýstrııa jáne ınfraqurylymdyq damý mınıstrliginiń málimetine sáıkes, jalpy aýmaǵy 784 myń sharshy metrdi quraıtyn baspanalar qarjylandyrýdyń barlyq kózderi esebinen salynady.
«Bıylǵy І toqsanda salaǵa 6,4 mlrd teńge ınvestıtsııa baǵyttalyp, jalpy aýdany 130,3 myń sharshy metr bolatyn 922 jeke úı paıdalanýǵa berildi. Jalpy bıyl «Nurly jer» memlekettik baǵdarlamasy sheńberinde Qyzylorda oblysynda ınjenerlik-kommýnıkatsııalyq ınfraqurylym jáne turǵyn úı qurylysyna 9,6 mlrd teńgege 47 joba iske asyrylyp, 1385 adam jumyspen qamtylady», - delingen mınıstrlik aqparatynda.
Kredıttik nemese jalǵa beriletin 873 páterdi paıdalanýǵa berý josparlanyp otyr.
Onyń ishinde satyp alý quqyǵynsyz arendalyq baspana qurylysyna 22 jobany iske asyrýǵa 5,3 mlrd teńge qarastyrylǵan. Birinshi toqsanda bul maqsatqa 60 mln teńge aýdarylyp, ol tolyqtaı ıgerildi. Jyl sońyna deıin jalpy aýdany 43,8 myń sharshy metr bolatyn 680 jalǵa beriletin páter paıdalanýǵa beriledi. Halyqtyń az qamtylǵan áleýmettik toptaryna, kópbalaly otbasylarǵa beriletin ol baspanalardyń qurylysyna 825 adam jumysqa tartylady.
Al kredıttik turǵyn úı qurylysyna 17 jobany iske asyrý úshin 1,9 mlrd. teńge qarastyrylǵan. Oǵan 12 myń sharshy metr turǵyn úı nemese 193 páterdi paıdalanýǵa berý josparlanǵan. Ol jobalardy iske asyrý úshin 301 adam jumyspen qamtylady.
Sonymen qatar, 2% nesıemen «Baqytty otbasy» baǵdarlamasy aıasynda 309 baspanany qaryzǵa berýge respýblıkalyq bıýdjetten 3 mlrd teńge qarastyrylyp otyr.
Oblysta turǵyn úı qurylystary júrip jatqan aýmaqtarǵa ınjenerlik-kommýnıkatsııalyq ınfraqurylym tartýǵa 8 joba iske asyrylady. Ol maqsatqa 2,4 mlrd teńge bólinedi. Atalǵan jobalar boıynsha 259 jumys orny ashylady.
