«Nurly jer»: Qostanaı oblysynda turǵyn úıdiń úsh jyldyq jospary quryldy
Oblystyq qurylys, sáýlet jáne qala qurylysy basqarmasynyń basshysy Berik Tańjaryqovtyń sózinshe, «Nurly jer» baǵdarlamasy arqyly bıyl óńirde 330 myń sharshy metr turǵyn úı paıdalanýǵa beriledi. Qurylys ósimi byltyrǵymen salystyrǵanda 10%-ǵa artyq. Ótken 9 aıda 2 825 páter tapsyryldy.
«Aldaǵy ýaqytta «ıÝbıleınyı» yqsham aýdanynda 230 páterli 3 kredıttik úı salynady. Jalpy, 3 jylda oblysta shamamen 1 mln. sharshy metr baspana halyq ıgiligine jaratylady. Keler jyly 3 myńnan artyq otbasy jańa páterlerge qonystanady, 2021 jyly – 384,9 myń sharshy metr turǵyn úı salý josparlanǵan. 2022 jyly 3 590 páter paıdalanýǵa beriledi. Jeke turǵyn úı qurylysynda da qurylys qarqyny tómendemeıdi. 2020 jyly – 116,4 myń, 2021 jyly – 109,4 2022 jyly 111,0 myń sharshy metr baspana turǵyzylady», - dedi Berik Tańjaryqov.
Oblys ákimi Arhımed Muhambetovtiń tapsyrmasy boıynsha, Berik Tańjaryqov qala jáne aýdan ákimderimen birlesip, oblystyń jyldyq josparyn jasaıdy. Ol qujatta 2020-2022 jyldarǵa arnalǵan turǵyn úı qurylysynyń perspektıvalary jáne qurylys aýdandaryna ınjenerlik-kommýnıkatsııalyq ınfraqurylymdy jetkizý máseleleri túziledi.
«Nurly jer» memlekettik baǵdarlamasy aıasynda bıyl qurylys jumystaryna 1,9 mıllıard teńge bólingen. Al «Baqytty otbasy» jobasy aıasynda turǵyn úı qurylys jınaq bankine 1 mlrd 325 mln teńgege azamattardan 176 ótinish kelip tústi. Barlyǵy 48 ıpotekalyq nesıe berilgen.
Oblys basshysy jańadan boı kótergen baspanalardy sý, jaryq, jylýmen qamtý jumystaryn belgilengen merzimnen keshiktirmeýdi tapsyrdy. Aımaqta 54 turǵyn úıge ınjenerlik ınfraqurylym tartý jumystary bastalyp ketken. Ótken 9 aıda qarjynyń 68%-y ıgerildi.
