«Nurly jer»: Qostanaı oblysynda kópbalaly analarǵa 82 páter berildi

QOSTANAI. QazAqparat – Tuńǵysh Prezıdent kúni merekesi qarsańynda Qostanaı qalasynyń «Aeroport» shaǵyn aýdanynda kóp qabatty turǵyn úı paıdalanýǵa berildi, dep habarlaıdy QazAqparat.

Jańa úıge qonystanǵan 108 turǵynǵa páter kiltterin oblys ákimi Arhımed Muhambetov tapsyrdy. Bul shaǵyn aýdandaǵy záýlim úılerdiń barlyǵy da «Nurly jer» baǵdarlamasy aıasynda salynǵan. Oblys ákimi turǵyndardy el tarıhyndaǵy mańyzdy merekemen quttyqtap, óńirde júzege asyrylyp jatqan turǵyn úı baǵdarlamalary týraly qysqasha aıtyp ótti.

«Kúni keshe kópbalaly analarǵa 82 páter tapsyrdyq. Qazir kezekte turǵan áleýmettik sanattaǵy kóptegen azamattar baspanamen qamtylyp jatyr. Jalpy, «Nurly jer» baǵdarlamasy boıynsha bıyl biz oblysta 330 myń sharshy metr turǵyn úıdi halyq ıgiligine berýdi josparlap otyrmyz. Búginde bul shaǵyn aýdandaǵy turǵyn úı qurylysy aıaqtaldy. Bıyl munda 7 úı turǵyzdyq. Onyń birazyna turǵyndar qonystanyp aldy. Endi 4 úıge baıqaý jarııaladyq. Sonymen «Aeroport» shaǵyn aýdanynyń qurylysy tolyǵymen aıaqtalady. Budan keıin baspana kezegindegi turǵyndar «Bereke» jáne «Qonaı» shaǵyn aýdandaryna qonystanady», - dedi aımaq basshysy.

Jalpy, «Nurly jer» turǵyn úı baǵdarlamasy boıynsha óńirge 18 mlrd teńgeden astam qarjy tartylǵan. Bul qarjynyń basym bóligi «Turǵyn úı jınaq banki» AQ arqyly nesıege berildi. Oblys basshysy aıtqandaı, Qostanaı oblysy turǵyn úı baǵdarlamasyn júzege asyrý boıynsha respýblıkada aldyńǵy úshtiktiń qatarynda.