Nurly jer: Qaraǵandy oblysynda bıyl 662 myń sharshy metr turǵyn úı salynady
Bul týraly QR Indýstrııa jáne ınfraqurylymdyq damý mınıstrliginiń Telegram paraqshasynan málim boldy, dep habarlaıdy QazAqparat.
Bıyl alǵashqy 10 aıda 468 myń sharshy metr baspana (4159 páter men jeke úıler) paıdalanýǵa berildi. Oblys halqynyń áleýmettik az qorǵalǵan toptary úshin jalǵa beriletin jáne kredıttik turǵyn úı qurylysyna 7 mlrd 703 mln teńge memlekettik ınvestıtsııa salyndy.
Qazirgi ýaqytta kezekte turǵan azamattar jalpy aýdany 21 myń sharshy metr bolatyn 327 páterdiń kiltin aldy. Jyl sońyna deıin jeńildetilgen baspana alý kezeginde turǵan taǵy 1153 otbasy baspanaly bolady.
«Jalpy, «Nurly jer» memlekettik baǵdarlamasy aıasynda óńirde ınjenerlik-kommýnıkatsııalyq ınfraqurylymdy júrgizýge, áleýmettik jalǵa beriletin jáne nesıelik turǵyn úı qurylysyna memleket 16 mlrd 568 mln teńge bóldi», delingen QR IIDM Qurylys jáne TKSh isteri komıtetiniń habarlamasynda.
Áleýmettik turǵyn úılerdi salý barysynda óńir turǵyndary úshin 763 jańa jumys orny ashyldy.
