«Nurly jer»: BQO-da 3 myńǵa jýyq jer telimi turǵyndarǵa berilmek

ORAL. QazAqparat - Batys Qazaqstan oblysynda turǵyn úı salý úshin jer kezeginde 100 914 adam tur, dep habarlaıdy «QazAqparat» tilshisi.

Oblystyq jer qatynastary basqarmasynyń basshysy Álııa Muhanbetjanovanyń óńirlik kommýnıkatsııalar qyzmeti alańynda málim etkenindeı, sonyń 71 005-i Oral qalasynyń úlesine tıedi. 2017 jyly oblys aýdandarynda turǵyn úı qurylysy úshin 594 jer telimi berildi.

Budan bólek «Nurly jer» baǵdarlamasy aıasynda bıyl turǵyn úı salýǵa 2 816 jer telimin berý kózdelýde. Sonyń ishinde Bórli aýdanynda 1 325, Aqjaıyqta 218, Jańaqalada 60, Zelenovta 640, Qaratóbede 60, Syrymda 66, Terektide 369, Shyńǵyrlaýda 78 jer telimi berilmekshi.

Basqarmasy basshysy sondaı-aq óńirden  kezinde RF Qorǵanys mınıstrliginiń memlekettik ushý-synaý ortalyǵyna uzaq merzimdi jalǵa berilgen jer telimine de toqtaldy. Ol 1 463,7 myń gektardy quraıdy, áskerı polıgonnyń aýdany - 1 465,1 myń ga.

«Bıyl 1995 jylǵy 20 qańtardaǵy memlekettik ushý-synaý ýchaskesin paıdalaný týraly kelisimge ózgerister men tolyqtyrýlar engizý týraly hattama qaıta qaralyp, soǵan sáıkes Kishi Boǵda ken ornyn ıgerýge qajetti 1 371 ga alqap memlekettik menshikke qaıtaryldy. Qazirgi tańda jerdi memlekettik menshikke qabyldaý aıaqtaldy», dedi Á.Muhanbetjanova.