«Nurly jer»: Bıyl Qostanaıda 3 myń páter paıdalanýǵa beriledi

Jyl basynan eseptegende Qostanaı oblysy turǵyn úı salý kórsetkishi jóninen respýblıkada segizinshi orynda tur. Búginge deıin 563 páter jáne 172 jeke turǵyn úı paıdalanýǵa berilgen.

«Bıyl «Nurly jer» baǵdarlamasy boıynsha 290,9 myń sharshy metr turǵyn úı salynady.  Byltyr 264,7 myń sharshy metr aýmaqqa turǵyn úı turǵyzylǵan edi. Injenerlik-kommýnıkatsııalyq ınfraqurylymǵa barlyq qarjy kózderinen 7,7 mlrd teńge qarastyryp otyrmyz. Turǵyn úı qurylysyna memlekettik oblıgatsııa esebinen 12,8 mlrd teńge bólindi. Jaqynda bul qarjynyń 1,2 mlrd teńgesin aldyq. Qalǵan aqsha Investıtsııalar jáne damý mınıstrligimen kelisilip beriledi. Sonymen qatar ekinshi jartyjyldyqta «Baıterek Development» AQ turǵyn úı qurylysyna 8,3 mlrd teńge baǵyttaıdy. Atalǵan qarajat 18 kredıttik úı men taǵy 25 jańa turǵyn úıdiń qurylysyna jumsalady. Úıler 2019 jyly tapsyrylady», - dedi oblys ákiminiń orynbasary Sergeı Karplıýk óz baıandamasynda.

Onyń sózinshe, 2018 jyly qurylysy byltyr bastalǵan 309 páterli 5 jaldamaly úıdiń qurylysy bıyl aıaqtalady. Jalpy, osy jyly 3021 páter óz ıelerin tabady.

«Turǵyn úı qurylysy jumystary qarqyn alǵanymen, páter kezegine turǵandardyń sany azaımaı tur. Ústimizdegi jyldyń 1 maýsymyna sáıkes, oblysta 25 myń adam úı kezeginde tur. Onyń 15 myńǵa jýyǵy halyqtyń áleýmettik álsiz toby. Sol sebepti, aýdandardaǵy eski ǵımarattardy qalypqa keltirý jumystaryn qolǵa aldyq. Nátıjesinde, oblystyń 3 qalasy men 10 aýdanyndaǵy 31 nysandy turǵyn úıge aınaldyrýǵa múmkindik bar», - dedi ol.

Qostanaı oblysy «7-20-25» memlekettik baǵdarlamasyn iske asyrýǵa ázir. 2021 jylǵa deıin óńirde 1,3 mln sharshy metr aýmaqqa turǵyn úı salyný josparlandy. Bylaısha aıtqanda, jylyna 3,5-4,5 myń páter qoldanysqa beriledi.

«7-20-25» baǵdarlamasy boıynsha aldaǵy tórt jylda 15 myń otbasyn baspanamen qamtamasyz ete alamyz. Onyń 10 myńy Turǵyn úı qurylys jınaq bankiniń salymshylary. Ulttyq banktiń oblystyń fılıaly taratqan málimet boıynsha, qazirgi kúni 100-den astam turǵyn «7-20-25» baǵdarlamasymen úı alýǵa nıet tanytqan. Jalpy, biz jańa baǵdarlamany aımaǵymyzda iske asyrýǵa daıynbyz», - deıdi oblys ákiminiń orynbasary.   

Oblys ákimi Arhımed Muhambetov turǵyn úı sharshy metriniń baǵasyn qalypta ustaýdy tapsyrdy.

«Naýyrzym aýdanyndaǵy Qaramendi, Jankeldın aýdanyndaǵy Torǵaı selosyndaǵy turǵyn úı qurylysy jumystaryn kórdim. Men aıtqan aýyldardaǵy úıdiń sharshy metri úshin tólenetin baǵa oblys ortalyǵyndaǵymen birdeı bolyp ketpesin. Osyny basa nazarǵa ustańyzdar. Munymen qosa, sol óńirlerdiń sánin keltirip turǵan eski ǵımarattar jeterlik. Solardy durys maqsatta paıdalaný kerek. Ákimderge osy máseleni qatań tapsyramyn», - dedi Arhımed Muhambetov.