«Nurly jer»: Bıyl Atyraý oblysynda 6,5 myń otbasy baspanaly bolady
QR Indýstrııa jáne ınfraqurylymdyq damý mınıstrliginiń málimetinshe, Atyraý oblysynda bıyl qarjylandyrýdyń barlyq kózderi esebinen 800 myń sharshy metr nemese 6,5 myń turǵyn úı salý kózdelip otyr.
«Bıylǵy І toqsanda salaǵa 8,1 mlrd teńge ınvestıtsııa baǵyttalyp, jalpy aýdany 149,6 myń sharshy metr bolatyn 1287 turǵyn úı paıdalanýǵa berildi.
Bıyl «Nurly jer» memlekettik baǵdarlamasy sheńberinde Atyraý oblysynda ınjenerlik-kommýnıkatsııalyq ınfraqurylym jáne turǵyn úı qurylysyna 20,3 mlrd teńgege 95 joba iske asyrylyp, 925 adam jumyspen qamtylady.
Kredıttik nemese jalǵa beriletin 620 páterdi paıdalanýǵa berý josparlanyp otyr. Onyń ishinde satyp alý quqyǵynsyz jalǵa beriletin turǵyn úı qurylysyna 13 jobany iske asyrý úshin 5 mlrd teńge qarastyrylǵan. Bıylǵy І toqsan qorytyndysynda ákimdikke 1,1 mlrd teńge aýdaryldy, qarajat tolyq ıgerilgen. Jyl sońyna deıin jalpy aýdany 10,2 myń sharshy metr bolatyn 157 jalǵa beriletin páter paıdalanýǵa beriledi. Halyqtyń az qamtylǵan áleýmettik toptaryna, kópbalaly otbasylarǵa beriletin ol baspanalardyń qurylysyna 480 adam jumysqa tartylady», - delingen aqparatta.
Al kredıttik turǵyn úı qurylysyna 43 jobany iske asyrý úshin 5 mlrd teńge qarastyrylǵan. Oǵan 27,8 myń sharshy metr turǵyn úı nemese 463 páter paıdalanýǵa beriledi.
Sonymen qatar, 2% nesıemen «Baqytty otbasy» baǵdarlamasyn júzege asyrýǵa bıyl respýblıkalyq bıýdjetten oblys ákimdigine 2,4 mlrd teńge qaryz berý qarastyrylǵan. Oǵan 239 baspanany usyný kózdelgen.
«Oblysta turǵyn úı qurylysy aýdandaryna ınjenerlik-kommýnıkatsııalyq ınfraqurylym júrgizýge 39 jobany iske asyrylady. Ol maqsatqa 10,3 mlrd teńge qarastyrylǵan. Bıylǵy І toqsanda ol qarajattyń 2,8 mlrd teńgesi aýdarylyp, 2,2 mlrd teńgesi ıgerildi. Atalǵan jobalarda 445 adam jumyspen qamtylady», - delingen mınıstrlik málimetinde.
