«Nurly jer» «Baspana 91» baǵdarlamasyn eki ese orap ketti
QR Indýstrııa jáne ınfraqurylymdyq damý vıtse-mınıstri Qaıyrbek Óskenbaevtiń aıtýynsha, búginde Qazaqstan turǵyn úı qurylysy jaǵynan postkeńestik elderdiń ishinde oq boıy ozyq keledi. Ótken jyly bir adamǵa shaqqanda 0,68 sharshy metr baspana paıdalanýǵa berildi. Bul - TMD memleketteri arasyndaǵy eń joǵary kórsetkish. Máselen, Reseıde - 0,54 sharshy metr, Belarýsta - 0,40 sharshy metr, al Ózbekstanda bir adamǵa shaqqanda jylyna 0,36 sharshy metr baspana salynady.
«Byltyr biz 12,5 mıllıon sharshy metr turǵyn úıdi salyp shyqtyq. Ol bir jyl buryn bolǵan kórsetkishten 12 protsentke artyq. Negizi, ótken jyly biz rekordtyq kórsetkishke jettik. Máselen, keńester kezinde «Baspana 91» degen baǵdarlama boldy. Ony Kolbınniń tusynda qabyldaǵan bolatyn. Sol kezde Qazaqstanda jylyna eń kóp degende 6,5 mıllıon sharshy metr turǵyn úı salyndy. Árıne, bul jerde «Qazirgi qurylys qarqynymen barlyǵyn baspanamen nege qamtamasyz etpeıdi?» degen zańdy suraq týyndaıdy. Degenmen, mańyzdy bir máseleni eskerý kerek. Biz 91-shi jyly jańaǵy 6,5 mıllıon sharshy metrdi saldyq ta, odan keıin qurylys qarqyny kúrt tómendedi. 1992-1999 jyldar aralyǵynda qurylystyń kólemi 1,2 mıllıon sharshy metrge deıin túsip ketti. Al 2000 jyldan bastap atalǵan kórsetkish birtindep kóterile bastady. Búginde Qazaqstanda qurylys qarqyny jyl saıyn 1-1,5 mıllıon sharshy metrge ulǵaıyp otyr. Aldaǵy ýaqytta 13 mıllıonǵa deıin jetetin oıymyz bar. Sonyń arqasynda shamamen 118 myń otbasy baspanaly bola alady», - dedi Q.Óskenbaev búgin memlekettik qyzmetti jańa formatta qalyptastyrýǵa arnalǵan paneldik sessııada.
Vıtse-mınıstrdiń aıtýysha, búginde baspanamen qamtamasyz etý salasyndaǵy barlyq sharalar «Nurly jer» baǵdarlamasy aıasynda atqarylady. Sonyń ishinde arendalyq baspana, turǵyn úı jınaqtary, «7-20-25» baǵdarlamasy jáne taǵy basqa tetikter bar. Al Turǵyn úı qurylys jınaq banki baspana alýdyń tıimdi tetigi bolyp sanalady. Sol sebepti atalǵan baǵytta bıýdjetten qyrýar qarjy bólinip turady.
Aıta keteıik, sessııa kezinde vıtse-mınıstr Q.Óskenbaev barlyq qazaqstandyqtardy baspanamen qamtýǵa qajetti qarajat somasyn da jarııalady.
«487 myń adamnyń máselesin birjola sheshýge, dál qazir 4 trıllıon 887 mıllıard teńge kerek bolyp tur. Onyń ınfraqurylymy 20 paıyz. Sonda kezekte turǵan azamattardyń baspana máselesin birden sheshý úshin respýblıkalyq nemese jergilikti bıýdjetten 6 trıllıon teńgedeı aqshany qazir qolma-qol jumsaý qajet», - deıdi Q.Óskenbaev.
