Nurly jer: Bankke páter qunynyń 20 paıyzyn jınap, baspana alýǵa bolady
Aqtóbede 311otbasy páterli boldy. Búgin «Nur Aqtóbe» yqsham aýdanynda turǵyndar qonys toıyn toılaýda.
«Árbir azamat, otbasy úshin baspananyń qandaı mańyzy bar ekenin jaqsy bilesizder. Qazaqta «úıi joqtyń kúıi joq» degen sóz bar. Memleket basshysy Nursultan Nazarbaev árbir qazaqstandyqty pátermen qamtamasyz etý úshin baǵdarlamalar usyndy. Osydan bir jyl buryn «Nur Aqtóbe» yqsham aýdanyndaǵy jańa aýmaqta úı salynady dep eshkim oılamady. Qazirdiń ózinde 1 myńǵa jýyq páter paıdalanýǵa berildi. Turǵyn úı qurylys jınaq bankinde 80 myńnan astam salymshy bar. Ári qaraı da turǵyn úı qurylys júrgiziletin bolady»,- dedi oblys ákimi Berdibek Saparbaev.
Aqtóbeniń jańa aýdanynda kópqabatty turǵyn úıler men kottedjderdiń taýnhaýstardyń qurylysy áli de júrip jatyr.
«Nurly jer» baǵdarlamasyna ózgertýler engizilip, salymshylarǵa jol ashyldy. Páter alýdy qalaıtyn adamdar páter qunynyń 20 paıyzyn jınasa, baspanaly bola alady»,- dedi «Turǵyn úı qurylys jınaq banki» AQ tóraıymy Lázzat Ibragımova.
Búgin páter alǵandardyń kóbi aýdan, aýylda turyp, aqsha jınaǵan. Olar búgin jańa páter alyp, kóship keldi.
«Men eki bólmeli páter aldym. Páter qunynyń 30 paıyzdan astamyn jınap, ótinish bergen edim. Jınaq banki quptap, qujat rásimdedim. Jas otbasymyz. Eki balamyz bar. Buǵan deıin Aqtóbe oblysy, Alǵa aýdany, Eset batyr aýylynda turdym. Keıin Aqtóbe qalasynda 2-3 aı páter jaldap, búgin jańa baspanama kóshtim. Aı saıyn 50 myń teńge tóleımin. Eń tıimdi joly osy boldy»,- dedi Gúlsim Ýlıanova.
Aıta keteıik, oblys ákimi Berdibek Saparbaev jańa aýdanda mektep, balabaqsha qurylysy júrip jatqanyn habarlady. Sonymen qatar, gaz, sý, jylý berý kezinde eshqandaı qıyndyq pen kedergi bolmaıtynyn jetkizdi. Qosymsha qoǵamdyq kólikter de qatynaıdy.
Buǵan deıin habarlaǵanymyzdaı, turǵyndar páter kiltin alǵanymen, qonystaný qıynǵa soqqanyn aıtyp, oblys ákiminen kómek suraǵan bolatyn.
