Nurly jer: Balqashta taǵy 92 otbasy baspanaly boldy

BALQASh. QazAqparat – Jańa jyl qarsańynda Balqashta 92 otbasy baspanaly boldy. Kópbalaly jáne múmkindigi shekteýli balalardy tárbıelep otyrǵandarǵa, UOS ardagerlerine teńestirilgen tulǵalarǵa, jetim balalarǵa jáne basqa da azamattarǵa páter kilti tabystaldy, dep habarlaıdy QazAqparat tilshisi.

Jańa úıge qonystanýshylar arasynda 39 jastaǵy Baqyt Mashenova - toǵyz balanyń anasy. Eń úlken balasy – 19 jasta, al eń kishisi - 7 aılyq náreste.

Kúıeýiniń tabysy jaldamaly páterdi tóleýge jetkiliksiz boldy. Al búgin - onyń ómirindegi eń baqytty kúnderdiń biri. Otbasy tórt bólmeli úı aldy.

Bul úıden taǵy bir páter Ábdirbaevtar januıasyna berildi. Olardyń alty balasy bar.

Úıler kópbalaly otbasylar úshin jeke ınvestordyń aqshasyna arnaıy salynǵan. Sodan keıin ákimdik olardy satyp aldy.

«Osyndaı úı bergeni úshin rahmet! Endi balalardyń óz bólmesi bolady. Barshańyzǵa osyndaı baqyt tileımin. Biz bul týraly kópten beri armandadyq», - deıdi jańa úıdiń ıesi Anar Ábdirbaeva.

Taǵy bir baspana Balqash qalasynyń 10-shy shaǵynaýdanynda ornalasqan. 45 páterli úı «Nurly jer» baǵdarlamasy boıynsha salyndy.

Jalǵa beriletin turǵyn úıler muqtaj balqashtyqtarǵa taratyldy. Onyń 9-y - jetim, 18-i - múgedek jáne múmkindigi shekteýli balalardy tárbıelep otyrǵan otbasylar.

Tolyq emes otbasylar men UOS ardagerlerine teńestirilgen adamdar taǵy 18 páter aldy.

Qala ákimi Oraz Táýirbekov úı ıelerine páter kiltin tabystady.

«Men búgin osy baqytty sátti sizdermen bóliskenime shyn júrekten qýanyshtymyn. Úılerińiz árqashan jyly jáne jaryq bolsyn!» - dedi Oraz Táýirbekov.

Bes qabatty ǵımaratqa qarama-qarsy jańa turǵyndar qonystandy. Olar ótken aptada №19 úıdegi páter kiltin aldy.

45 páterli úı «Nurly jer» baǵdarlamasynyń kredıttik baǵyty boıynsha salyndy. Turǵyn úı depozıti bar kezekte turǵandarǵa 35 páter berildi.

Olardyń shotynda páter qunynyń 20%-y bolyp, konkýrstan ótti. Jańa qonystanýshylar arasynda jalǵyzbasty analar, jetimder, dárigerler men oqytýshylar bar.

2020 jyly barlyǵy 160 muqtaj balqashtyq kópten kútken baspanaly boldy. Onyń kópshiligin «Nurly jer» baǵdarlamasy boıynsha memlekettik qordan turǵyn úımen qamtamasyz etti.

«Qazaqmys» korporatsııasy óziniń kópbalaly qyzmetkerleri úshin 46 páter men úı satyp aldy. Taǵy eki páterdi Balqashtyń janashyr kásipkerleri aýǵan jaýyngeri men kópbalaly jesir áıeline satyp áperdi.