«Nurly jer» baǵdarlamasymen baspana alý úshin jalaqy qansha bolýy qajet
Bul týraly QR Investıtsııalar jáne damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov Ortalyq kommýnıkatsııalar qyzmetinde ótken baspasóz máslıhatynda aıtty.
Mınıstrlik ókili turǵyn úı qurylys jınaq bankiniń salymshylarynyń bıyl bir mıllıonǵa jetkenin atap ótti jáne óńirler men basty qalalardaǵy baspana baǵasyn salystyrdy.
"Memlekettik baǵdarlama boıynsha baspananyń árbir sharshy metri óńirlerde 140 myń teńgeni quraıdy. Al Astana men Almatyda, Aqtaý, Atyraý qalalarynda - 180 myń teńge. Sáıkesinshe, elý sharshy metr bolatyn eki bólmeli páter aımaqtarda 7 mln teńge jáne Astana, Almaty, Aqtaý, Atyraý qalalarynda 9 mln teńge. Demek, ortasha tabysy 150-200 myń teńgeni quraıtyn otbasy aı saıyn 50-70 myń teńgeden tóleı alady. Osylaısha, 7-10 jyl aralyǵynda páter qunyn tolyq óteýge bolady", - dep jaýap berdi M.Jaıymbetov QazAqparat tilshisiniń suraǵyna.
Aıta keteıik, Ortalyq kommýnıkatsııalar qyzmetinde QR Investıtsııalar jáne damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov «Nurly jer» baǵdarlamasynyń 10 aıdaǵy qorytyndysyn jarııalady.
Jyl basynan beri Qazaqstanda barlyq qarjylandyrý esebinen 8,8 mln sharshy metr (77 myń baspana) paıdalanýǵa berilgen. Atap aıtqanda, 5,1 mln sharshy metr (56,7 myń páter) kópqabatty turǵyn úı jáne 3,7 mln sharshy metr (24,1 myń páter) jeke turǵyn úı turǵyzylǵan.
Turǵyn úılerdi paıdalanýǵa berý boıynsha aldyńǵy qatarda Astana (2,2 mln sh.m), Almaty (1,2 mln sh.m) qalalary men Mańǵystaý (676 myń sh.m), Atyraý (555 myń sh.m) jáne Ońtústik Qazaqstan (525,5 myń sh.m) oblystary tur.
