«Nurly jer» baǵdarlamasy: Bir jylda 101 myńǵa jýyq adam baspanaly boldy
Elbasy usynǵan baǵdarlama boıynsha salynǵan baspananyń 72 myń 904-i kópqabatty bolsa, qalǵan 27 myń 908-i - jeke úıler. Óńirler arasynda baspanany qoldanysqa berý boıynsha 42,4 paıyz kórsetkishpen - Batys Qazaqstan, 36,2 paıyzben - Ońtústik Qazaqstan jáne 35,6 paıyzben Qostanaı oblystary alda keledi.
«Baǵdarlamanyń birinshi baǵyty boıynsha óńirlerde satyp alý quqyǵynsyz jalǵa beriletin jalpy aýmaǵy 288 myń sharshy metr turǵyn úılerdiń qurylysy júrip jatyr. Bul - shamamen 5376 páter. Ótken jyldyń 12 aıynda halyqtyń áleýmettik álsiz toptaryna 2620 baspana berilgen. Jospar boıynsha atalǵan jumystar 2019 jylǵa deıin aıaqtalady. Bul rette, respýblıkalyq bıýdjetten 25 mlrd teńge bólinip otyr», - delingen QR IDM habarlamasynda.
Sonymen qatar, «Nurly jer» baǵdarlamasy aıasynda turǵyn úı qurylysy júrip jatqan aýdandarǵa, jeke turǵyn úı salynyp jatqan aýmaqqa ınjenerlik kommýnıkatsııa tartý sharalary da atqarylyp jatyr. Qazirgi ýaqytta 70,3 myń ýchaskede jeli tartý jumystary júrýde. Baǵdarlamanyń úshinshi baǵyty aıasynda, ıaǵnı kredıttik turǵyn úı qurylysy boıynsha elimizde 16 myń 217 páter qoldanysqa berilgen.
Sonymen birge, jeke qurylys salýshylardy yntalandyrý úshin ekinshi deńgeıli bankter 2017-2018 jyldar aralyǵynda 152 mlrd teńge zaım beredi. Bul somaǵa jeke qurylys salýshylar 600 myń sharshy metr turǵyn úı sala alady.
«Ipotekalyq nesıe berýdiń qoljetimdiligin joǵarylatý maqsatynda «Nurly jer» baǵdarlamasy arqyly 120 mlrd teńgege 8 myń zaım berý josparlanǵan. 2017 jyly 13,4 mlrd teńge somasyna 1,3 myń zaım berilgen. Al bıylǵy maqsat - 106,6 mlrd teńgege 6,7 myń zaım berý», - dep túsindirdi mınıstrlik.
2018 jyly atalǵan baǵdarlama aıasynda taǵy 100 myń páterdi paıdalanýǵa berý kózdelgen.
