«Nurly jer» baǵdarlamasy: batysqazaqstandyq 3 myń otbasy baspanaly boldy

ORAL. QazAqparat - Batys Qazaqstan oblysynda «Nurly jol» jáne «Nurly jer» baǵdarlamalaryna 28 mlrd teńge bólinip, qyrýar jumys atqaryldy. Bul týraly búgin qoǵamdyq keńes músheleri aldynda esep bergen oblys ákimi Altaı Kólginov málim etti, dep habarlaıdy «QazAqparat» tilshisi.

Óńir basshysynyń aıtýynsha, atalǵan eki baǵdarlama boıynsha 2215 jumys orny ashylyp, jergilikti kásiporyndar tolyq qýatynda jumys isteýge múmkindik aldy. Naqty nátıje retinde sońǵy eki jylda 3 myń otbasynyń baspanaǵa qol jetkizgenin aıtýǵa bolady.

Oblysta ótken jyly 500 shaqyrym joldy jóndeý qolǵa alynǵan bolatyn. Sonyń búginde 33 mlrd teńgege 420 shaqyrymy aıaqtaldy. Bıyl «Nurly jol» baǵdarlamasyna sáıkes Oral-Tasqala-RF shekarasy kúre jolyn kúrdeli jóndeý tolyqtaı márege jetedi.

 

Oblystyq mańyzy bar joldardyń 128,5 shaqyrymy jóndeldi. Oral qalasynda jumysy bastalǵan 67 kósheniń 61-inde jol retke keltirildi. Qalǵan kóshelerde jumys bıyl odan ári jalǵasady. Oral qalasynda eki jylǵa josparlanǵan Depo kópiri qurylysy merziminen buryn bitpekshi. Sodan keıin Omega kópiri qaıta salynady.

Óńirde turǵyn úı qurylysy qarqyndy júrgizilýde. Mysaly, ótken jyly barlyǵy 390 myńnan astam sharshy metr turǵyn úı paıdalanýǵa berildi, bul aldyńǵy jylǵydan 42 paıyzǵa artyq. Josparlanǵan 10 kóp qabatty úıge (1426 páter) qosa jeti aýdanda 113 úı (139 páter) boı kóterdi. Aýdandardaǵy qalǵan 70 úı bıyl beriledi. Sondaı-aq ınjenerlik-kommýnıkatsııalyq ınfraqurylym boıynsha 15 nysanda (115 km) qurylys jumysy júrgizilse, sonyń 9-ynda (52 km) aıaqtaldy. Qalǵany bıylǵa aýysyp otyr.

 

«Elbasy tapsyrmasyna sáıkes óńirde atqarylyp jatqan jumystarǵa qoǵamdyq keńes músheleriniń, máslıhat depýtattarynyń qosyp otyrǵan úlesi mol. Osy ýaqytqa deıin qoǵamdyq keńestiń 22 otyrysy ótip, sonda kóterilgen 125 máseleniń barlyǵy da tolyq óz sheshimin tapty. Aldaǵy ýaqytta da jumystardyń barlyǵyn birlesip atqaratyn bolamyz», - dedi Altaı Kólginov.