«Nurly jer» aıasynda jyl saıyn 40 myń adam jeke úıin sala alady
ASTANA. QazAqparat - Osylaısha, 15 jyldyń ishinde "Nurly jer" baǵdarlamasy aıasynda 600 myńnan astam adam jer telimin alyp, jeke úıdi turǵyza alady, dep xabarlaıdy QazAqparat tilshisi.
"Osyndaı jospar bar. Buryn jer nege berilmedi? Infraqurylym jelileri, ıaǵnı sý men jaryq tartylmaǵannan keıin jer berilmedi. Bıyldan bastap "Nurly jer" baǵdarlamasy aıasynda jyl saıyn 80 mıllıard teńge qarjy bólinedi. Sonyń 30-40 mıllıard teńgesi ınfraqurylym jelilerin tartýǵa jumsalatyn bolady. Jyl saıyn 40 myń adamǵa jer ýchaskeleri beriledi degen josparymyz bar", - dedi QR Investıtsııalar jáne damý mınıstriligi Qurylys jáne turǵyn úı - kommýnaldyq sharýashylyq isteri komıtetiniń tóraǵasy Marxabat Jaıymbetov búgin Astanada ótken baspasóz máslıxatynda.
Onyń aıtýynsha, búginde respýblıka boıynsha jer kezeginde turǵandardyń sany 1 mıllıon 300 myń adamǵa jetken.
Aıta keteıik , aǵymdaǵy jylda nesıege aqshasy joq azamattarǵa arendalyq páterler salynady. Budan bólek, komıtet memlekettik mekemelerge baspanaǵa muqtaj qyzmetkerler úshin páterdiń alǵashqy jarnasyn salýǵa ruqsat berý tetigin engizýdi kózdeıdi .
